Aktivisti qytetar dhe humanisti Shkodran Alili ka shpallur sot zyrtarisht kandidaturën e tij të pavarur për kryetar të Komunës së Kërçovës, gjatë një tubimi të organizuar në sallën sportive “Ivanidoll”, ku morën pjesë një numër i madh qytetarësh, transmeton ZYRTARE.net
Në fjalimin e tij para të pranishmëve, Alili theksoi se vendimi për të hyrë në garën për udhëheqës të qytetit nuk vjen si rezultat i ndonjë ambicie personale, por si përgjigje ndaj thirrjeve të qytetarëve dhe miqve që, sipas tij, kërkojnë ndryshim dhe një të ardhme më të mirë për Kërçovën.
“Para jush shpalla kandidaturën për kryetar të Kërçovës. Këtë e bëra jo si ambicie, por si kërkesë e miqve dhe atyre që ia duan të mirën Kërçovës,” deklaroi Alili gjatë fjalimit.
Ai shtoi se nuk ka ndërmend të përfaqësojë ndonjë parti politike, por synon të mbrojë dhe të përfaqësojë vetëm interesat dhe besimin e qytetarëve.
Kandidatura e Alilit pritet të sjellë dinamizëm të ri në garën për të parin e komunës, veçanërisht në një klimë politike ku zërat e pavarur po fitojnë gjithnjë e më shumë mbështetje nga opinioni./ZYRTARE.net/
