Ndihmëssekretari amerikan i Shtetit për Çështjet Evropiane dhe Euroaziatike, James O’Brien ka reaguar pas aksionit të Qeverisë së Kosovës në veri që rezultoi me mbylljen e pesë objekteve të komunave ilegale në veri të Kosovës.
O’Brien tha se e mbështet deklaratën e Ambasadës së SHBA-së në Prishtinë dhe i bëri thirrje urgjente kryeministrit Albin Kurti që t’i ndalë veprimet e pakoordinuara me miqtë ndërkombëtar.
Në një postim në rrjetin “X”, O’Brien tha se SHBA është e shqetësuar nga veprimet e pakoordinuara dhe provokuese të Qeverisë së Kosovës.
”SHBA-ja është e shqetësuar nga vazhdimi i veprimeve të pakoordinuara dhe provokuese të Qeverisë së Kosovës. Ne vlerësojmë punën e atyre, përfshirë EULEX-in dhe KFOR-in, të cilët parandalojnë dhunën dhe bëjnë thirrje për përmbajtje të vazhdueshme nga të gjitha palët. I bëjmë thirrje urgjente kryeministrit Kurti dhe qeverisë së tij që të konsultohen dhe të koordinohen me komunitetin ndërkombëtar dhe të ndërpresin veprimet e pakoordinuara që ndikojnë negativisht në partneritetin tonë”, tha ai.
Veprimet e pakoordinuara të Qeverisë së Kosovës e detyruan edhe një herë në orët e vona të mbrëmjes që të reagojë Ambasadën Amerikane në Prishtinë.
Ishte një aksion i Policisë së Kosovës për mbylljen e pesë objekteve të komunave ilegale në veri të Kosovës ai që provokoi reagimin e ashpër amerikan, të cilët u shprehën të zhgënjyer “me veprimet e vazhdueshme të pakoordinuara të ndërmarra nga Qeveria e Kosovës”.
Në reagimin e SHBA-së thuhet se veprimet e fundit nuk janë në përputhje me premtimet e bëra nga Qeveria për koordinim./Sinjali/
