Nuk do të ketë më profesorë universitarë të përhershëm! Do t’i nënshtrohen rizgjedhjes çdo shtatë vjet

Profesorët universitarë nuk do të mund ta presin më qetësisht pensionin pasi të zgjidhen në funksion, por çdo 7 vjet do të duhet të kalojnë në rizgjedhje për ta ruajtur pozitën e tyre. Në të kundërtën, do t’u ndërpritet marrëdhënia e punës dhe do të duhet të kërkojnë një vend tjetër pune. Kjo është një nga risitë më të rëndësishme që përmbahen në Ligjin e ri për Arsimin e Lartë, i cili ndodhet në fazën përfundimtare dhe së shpejti do të vihet në shqyrtim publik përmes sistemit ENER. Ministrja e Arsimit dhe Shkencës, Vesna Janevska, gjatë një brifingu me gazetarët tha se po rikthehet obligimi që më parë ishte shfuqizuar. Ajo sqaroi se fillimisht po rikthehen kriteret për avancim në tituj akademikë. Për profesorët e rregullt po vendoset rizgjedhje çdo shtatë vjet. Deri tani, ata në moshën 40-vjeçare bëheshin profesorë të rregullt dhe e prisnin qetësisht pensionin në moshën 67-vjeçare, duke e pasur titullin për gjithë jetën. Tani, çdo shtatë vjet do t’i nënshtrohen vlerësimit. Kriteret për rizgjedhjen dhe kush do ta kryejë atë do të parashikohen me Ligjin e ri – shpjegoi Janevska.