Ensar Ismeti, nënkryetari i Forumit Rinor të Aleancës për Shqiptarët (FRASH), ka reaguar publikisht përmes një postimi kritik ndaj drejtimit aktual të partisë, duke shprehur zhgënjim me atë që ai e cilëson si politikë pa parime dhe lëvizje oportuniste brenda lidershipit të ASH-së.
Në mesazhin e tij, Ismeti shkruan se “politika nuk është trampolinë, por përgjegjësi”, duke aluduar për politikanë që ndërrojnë pozicionin politik për përfitime personale dhe duke kritikuar qasjen e kryetarit aktual të partisë, i cili sipas tij, është më i përqendruar në zgjatjen e karrierës së vet politike sesa në përfaqësimin e qytetarëve dhe aktivistëve që e kanë mbështetur.
Ismeti thekson se ai dhe të tjerë si ai do të vazhdojnë rrugën me parime dhe besnikëri ndaj idealeve të vërteta politike, jo ndaj interesave personale. Deklarata e tij shihet si një qëndrim i qartë kundër zhvillimeve të fundit në parti, veçanërisht pas ndarjeve të brendshme dhe debatit mbi qëndrimin ndaj BDI-së.
Postimi i plotë:
17.05.2025
Politika nuk është trampolinë.
Është përgjegjësi.
Ky mentalitet që i kthen shpinën vullnetit të popullit dhe ndërron ngjyrat çdo ditë për hir të karrierës personale, nuk dëmton vetëm identitetin e një politikani , ai cenon thellë besimin e qytetarëve që ai pretendon të përfaqësojë.
Fatkeqësisht, ka prej atyre që politikën e shohin si një trampolinë për të kërcyer nga një vijë në një tjetër politike.
Jo si provë ndershmërie, por si mjet për përfitim personal.
Dje ishin këtu, sot janë atje, e nesër askush nuk e di, sepse rrugën e tyre nuk e udhëheqin parimet, por interesat.
Politika pa parime është bosh.
Një boshllëk që sot, për fat të keq, e përfaqëson edhe udhëheqja e kryetarit tonë, i cili duket se shqetësohet më shumë për zgjatjen e jetës së vet politike, sesa për ata që i dhanë mbështetje ,aktivistë të ndershëm e të palodhur të Aleancës për Shqiptarët.
Për mua, politika nuk ka të bëjë me ndërrimin e drejtimit, por me dhënien e drejtimit.
Qëndrimi i një njeriu matet me sa herë qëndron i palëkundur përballë stuhive.
Por sot, fatkeqësisht, kemi politikanë që e quajnë “aftësi” ndryshimin e formës sipas drejtimit të erës.
Unë dhe shumë si unë do të vazhdojmë të ecim përpara.
Me kokën lart.
Me parime që nuk thyhen.
Me besnikëri ndaj atyre që na besojnë.
Jo pas interesit, por për të vërtetën.
Jo pas karrierës personale, por për të ardhmen e përbashkët.
Me respekt,
Ensar Ismeti
Nënkryetar Forumi Rinor i Aleancës për Shqiptarët – FRASH
