Qeveria e Republikës së Maqedonisë së Veriut, në përbërjen e mëparshme, në seancën e mbajtur më 11.07.2023, miratoi Strategjinë për Reformën e Administratës Publike 2023 – 2030 dhe Planin e Veprimit 2023 – 2026 për të njëjtën Strategji. Qeveria në Strategjinë e saj, përcaktoi se “… tejkalohet nevoja e aplikimit të mjetit balancues, i cili në praktikë shkakton keqpërdorime të shumta…”.
Në tekstin e plotë të seksionit të Strategjisë së Qeverisë për Reformat e Administratës Publike 2023-2030 thuhet: “…parimi i qasjes së barabartë në çdo vend pune, parimi i ekspertizës dhe kompetencës dhe parimi i barazisë gjinore duhet të jenë parësor dhe të zbatohen vetëm në të gjithë procesin e përzgjedhjes, punësimit dhe avancimit në të gjitha nivelet në administratën publike, ndërsa në fazën para marrjes së vendimit të përzgjedhjes, natyrisht që duhet të merret parasysh parimi i përfaqësimit adekuat dhe të drejtë të pjesëtarëve të komuniteteve. Në këtë mënyrë nga njëra anë tejkalohet nevoja e përdorimit të mjetit të quajtur “balancues”, i cili në praktikë shkakton keqpërdorime të shumta…”.
Gjatë javëve të kaluara u hap një debat për vendimin e Gjykatës Kushtetuese për ngrirjen e aplikimit të Balancuesit. Në këtë debat opozita akuzoi Qeverinë e re për një deshqiptarizim të qëllimshëm dhe të shënjestruar, ndërsa partitë në pushtet nga koalicioni VLEN akuzuan për mashtrim dhe shkaktim të qëllimshëm problemesh politike nga përbërja e vjetër e Gjykatës Kushtetuese e zgjedhur me votat e BDI-së dhe LSDM-së.
Atë që publiku nuk e dinte deri më sot është se Qeveria, në përbërjen e mëparshme, me vendimin për miratimin e Strategjisë së Reformës së Administratës Publike 2023-2030 hapi debatin dhe nevojën që Gjykata Kushtetuese të merrte vendimin për rishikimin dhe ngrirjen e Balancuesit. Këtë seancë të qeverisë e drejtoi Fatmir Bitiqi nga LSDM-ja, por të pranishëm ishin ministrat e BDI-së Fatmir Besimi dhe Jeton Shaqiri.
Fatmir Bitiqi, Fatmir Besimi dhe Jeton Shaqiri si zyrtarë politikë shqiptarë ia hapën dyert dhe mundësinë Gjykatës Kushtetuese për të ngrirë Balancuesin. Madje, Qeveria në përbërjen e mëparshme ka dhënë një konkluzion shtesë për të obliguar ministritë që të përcaktojnë koordinatorët për zbatimin e kësaj Strategjie dhe reforme.
