Sipas të dhënave zyrtare të Entit Shtetëror për Statistikë, vetëm në tetë vitet e fundit, 238 shqiptarë kanë arritur titullin akademik “Doktor Shkencash” në universitetet e Maqedonisë së Veriut. Nga këta, 114 ose gati gjysma, janë diplomuar në Universitetin “Shën Qirili dhe Metodi”, i cili ka rangun më të lartë sipas listës së Shangait ndër universitetet në vend.
Sekretari i Komunës së Çairit, z. Faruk Nevzadi, thekson se kjo rritje e intelektualëve shqiptarë që kanë përfunduar studimet e doktoraturës në universitetet më të njohura vendase është një arritje e rëndësishme për komunitetin. Nevzadi nënvizon se duhet krijuar kushte të përshtatshme për të zhvilluar hulumtimin shkencor të këtij grupi intelektualësh.
“Nëse dikush ua ka mbyllur dyert këtyre intelektualëve dhe heziton t’i përfshijë në dhënien e kontributit të tyre të çmuar në hulumtimin shkencor, atëherë do të përdoren të gjitha mjetet ligjore për të mbështetur këtë strukturë akademike, e cila është pjesë e rëndësishme e komunitetit që përfaqësojmë,” theksoi Nevzadi.
Në vazhdim, sekretari i Çairit publikoi edhe një tabelë me të dhëna zyrtare nga Enti Shtetëror i Statistikës, për të ilustruar rritjen e kësaj strukture akademike në Maqedoninë e Veriut.
