Autoritetet turke ndaluan të premten një avokat i akuzuar për shitje informacioni te detektivë që punonin për agjencinë izraelite të inteligjencës, Mossad, thanë burime të sigurisë.
Tugrulhan Dip u arrestua në Istanbul në një operacion të përbashkët të Organizatës Kombëtare të Inteligjencës (MIT), Zyrës së Kryeprokurorit të Istanbulit dhe Departamentit të Policisë Kundër Terrorizmit të qytetit, sipas burimeve.
Dip dyshohet se ka mbështetur Serkan Cicek, një detektiv privat i kapur dhe ndaluar gjithashtu, si dhe ka bashkëpunuar me disa detektivë të tjerë të përfshirë në spiunazh për Izraelin. Njëri prej këtyre detektivëve, Musa Kus, është dënuar me 19 vjet burg për aktivitete spiunazhi.
Dip u ka ofruar detektivëve të dhëna personale nga regjistrat publikë për përfitim financiar dhe ka shitur informacionin që kishte aksesuar përmes një paneli të krijuar prej tij, një sistem i paligjshëm për kërkimin e të dhënave.
Më herët gjatë ditës, autoritetet ndaluan detektivin privat Cicek, i akuzuar se ka punuar për Mossadin, në një operacion të përbashkët me prokurorët dhe policinë në Istanbul, sipas burimeve. Operacioni kishte emrin e koduar “Metron Activity”.
Zyrtarët e sigurisë thanë se ai kishte punuar për Mossadin dhe kishte qenë në kontakt me Faysal Rasheed, një anëtar i Qendrës së Operacioneve Online të Izraelit.
Cicek dyshohet se ka pranuar të ketë kryer vëzhgime në Istanbul, me kërkesë të Rasheed, ndaj një aktivisti palestinez që kundërshton politikat e Izraelit në Lindjen e Mesme.
