Këshilltari i presidentit të SHBA-së, Donald Trump, Elon Musk, deklaroi sot se shpreson të krijohet një zonë tregtare pa tarifa midis Shteteve të Bashkuara dhe Evropës.
Musk gjatë një video-lidhje në Kongresin Freedom of Speach, të partisë së Matteo Salvini në Firencë të Italisë, tha se krahas heqjes së detyrimeve doganore duhet të mundësohet edhe lëvizja më e lehtë e njerëzve ndërmjet dy kontinenteve.
“Shpresoj se ata do të bien dakord që si Evropa ashtu edhe SHBA të lëvizin, të paktën sipas mendimit tim në mënyrë ideale, drejt një sistemi pa tarifa, i cili në thelb do të krijonte një zonë të tregtisë së lirë midis Evropës dhe Amerikës së Veriut. Unë jam gjithashtu në favor të më shumë lirisë për njerëzit që të lëvizin midis Evropës dhe Amerikës së Veriut nëse ata duan të punojnë në Evropë ose Amerikë. Kjo do të ishte këshilla ime për presidentin,” tha Musk.
Elon Musk ka kritikuar rregulloret e BE-së, duke thënë se ato po mbysin sipërmarrjen dhe se për shkak të rregulloreve strikte, Evropa nuk është vend i mirë për të filluar një biznes të ri, raporton KosovaPress.
Kjo duket të jetë deklarata e parë e Musk për tarifat pasi Trump prezantoi ato më 2 prill për 185 vende të botës, një pjesë e të cilave hyri sot në fuqi, ndërsa pjesa tjetër prej datës 9 prill. Në mesin e vendeve me tarifa janë edhe Kosova e Shqipëria, me nga 10 për qind.
