Dy partitë opozitare Lidhja Demokratike e Kosovës dhe Aleanca për Ardhmërinë e Kosovës kanë adresuar sot kritika në drejtim të Qeverisë Kurti.
LDK përmes kryetarit të saj Lumir Abdixhiku e AAK përmes kryetarit të Grupit Parlamentar, Besnik Tahiri, kanë akuzuar qeverinë për mospunë dhe arrogancë, ndërsa ia kanë kujtuar kreut të ekzekutivit se zgjedhjet janë afër, shkruan Reporteri.net.
Kreu i LDK-së thotë se Qeveria aktuale ka përgjegjësi të plotë në Trepçë pasi ka katër vite që e menaxhon, e ka caktuar Bordin e Menaxhmentin, dhe se duhet të zgjedhin probleme e jo të ofendojnë minatorët.
Ai ka thënë se Qeveria duhet ta mbajë mend arrogancën e saj pasi zgjedhjet janë afër.
“Këtë arrogancë pushteti e sjellje mbajeni në mend. Zgjedhjet janë afër. 9 shkurti po vjen. Kuptojeni se këta nuk njohin ndjenjën e shërbimit ndaj tjetrit sepse i shërbejnë veç vetes. Siç nuk kuptojnë se aty – me 51% – janë për udhëheqje e zgjidhje problemesh; më së paku për ofendim, poshtërim e nënshtrim të hallgjorëve!”, ka shkruar Abdixhiku.
Kurse shefi i Grupit Parlamentar të AAK-së, Besnik Tahiri, i ka parashtruar pesë pyetje Qeverisë që lidhen me arsimin, rrugët, pensionet, shëndetësinë dhe Bordin e RTK-së.
Tahiri ka thënë se Qeveria e Kosovës duhet të kthehet në realitet dhe të punojë najsen, dhe të mos mashtrojë, shkruan Reporteri.net.
“I madh e i vogël në këtë vend është duke u marr me tema të sigurisë e tema të nivelit të lartë, pa pasur kurfarë dije e as njohurie për to. Tani, është mirë t’i kthehemi jetës në Kosovë, t’u kthehemi problemeve të cilat janë bërë të papërballueshme për funksionimin normal të mirëqenies së një familje.
Janë 5 pyetje që kërkojnë përgjigje shpejt.
1. Një javë para fillimit të vitit shkollor, kur do të dalin paratë për libra dhe a është gjithçka gati për vitin e ri shkollor? Asnjë përgjigje dhe qetësi nga MAShTI.
2. A do të përfundojnë para dimrit këto rrugë? A do të hyjmë në vitin 2025 me katrahurën e rrugëve që i lidhin Gjakovën, Gjilanin, Mitrovicën e Podujevën me kryeqytetin? Dhe, a do t’i rimbursoni mbi 2500 biznese të cilat janë para bankrotimit?
3. Kur do t’i rrisni pensionet? A po pritni për ta bërë këtë para fushatës zgjedhore? A e dini që Interlokutori i Kurtit në dialog, Vuçiq, ka njoftuar se nga 1 dhjetori 2024 do të rriten pensionet në Serbi. Ky i yni, jo vetëm që përmes dialogut nuk i ka kthyer mjetet e vjedhura nga Serbia, siç kishte premtuar gjatë kohës në opozitë, por i ka lënë pensionet në nivel të asistencës sociale, që nuk u ofron të moshuarve as mjete të mjaftueshme për trajtim shëndetësor!
4. A do të hiqni dorë nga kapja e institucioneve të pavarura dhe a do të ndaleni me sulmet e juaja, e më së keqi me kthyer RTK-në në organ partiak? Cili është kriteri për përzgjedhjen e tre anëtarëve tjerë të Bordit.
5. Kur do të kalojë Ligji për Sigurimet Shëndetësore? E di që për pagat në sektorin publik as që e keni në plan, as nuk do ta bëni kur ta sillni buxhetin e vitit 2025.
Përgjigjuni në këto pyetje e mos u mundoni të merreni me tema të mëdha, se sot për sot këto çështje janë interes qytetar e shtetëror.
Kthehuni në realitet, mos mashtroni, punoni najsend!”, ka shkruar ai. /Reporteri.net/.
