Gjykata e Tetovës dënoi me nga një vit e gjashtë muaj burg efektiv, ish drejtorin e spitalit klinik të Tetovës Florin Besimi dhe ish drejtorin ekonomik Artan Etemi. Spitalit klinik të Tetovës, njëjtë si gjatë gjykimit të parë, u sanksionua me 1 milion denarë, shkruan Alsat.
Gjykatësi i lëndës, Rexhep Musa, gjatë leximit të vendimeve tha se për veprën krime të rënda kundër sigurisë publike parashikohet burg nga një deri në pesë vjet, ndërsa gjykata ka marrë parasysh të gjitha rrethanat rënduese dhe lehtësuese për të akuzuarit.
Familjarët e viktimave u shprehën të zhgënjyer nga ky vendim i gjykatësit, ndërsa kërkojnë me çdo kusht që para drejtësisë të vendosën edhe ish ministri i Shëndetësisë Venko Filipçe si dhe ish ministri Angjushev.
“Ne si familjarë nuk jemi të kënaqur me këtë vendim që e mori gjykata, sepse po ta pjesëtosh 14 viktima pra, një vit e gjashtë muaj i bie për secilën viktimë nga një muaj burg të bëj. Pra vlera e një jete në vendin tonë ka vlerë një muaj burg. Kështu që ne si familjarë nuk jemi të kënaqur me vendimin. Ne e kemi thënë dhe do e them, në rastin e spitalit duhej të ishin të akuzuar edhe Ministri i Shëndetësisë, Filipçe, Angjushev, BRAKO, Instaluesi i rrymës sepse e gjitha që ndodhi në spital siç e kam pa unë që isha në dhomë atë natë ishte rryma. Ne si familjarë do bëjmë ankesë më tutje, nuk jemi të kënaqur”, tha Mumin Ismaili, Familjar.
“Nga ky vendim i gjykatës sot ndjehem i turpëruar të dal nga gjykata. Për katërmbëdhjetë persona që vdesin dënohen një vit e gjashtë muaj, nuk bëhet ky shtet kurrë”, u shpreh Ibin Emshi, Familjar.
Ish drejtori i Spitalit Klinik të Tetovës Florin Besimi pas dëgjimit të dënimit, tha se do vazhdojë të kërkoj drejtësinë në instancat e tjera, sepse sipas tij, gjykata nuk ka dashur të nxjerr drejtësinë në pah si për familjarët po ashtu edhe për të, por kanë kërkuar fajtor kujdestar.
“Mua më akuzuan për mungesë të aparateve kundër zjarrit, e në fakt unë në thelb isha edhe kundër objektit dhe kam refuzuar ta pranoj objektin, ja dokumenti që nuk jam i nënshkruar. Këtë e di edhe prokuroria dhe të gjithë, edhe nëpër mbledhje e kam cekur edhe ekziston dokumenti por nuk u mor parasysh. Kjo nuk është drejtësi kjo është shmangie nga e vërteta. Unë nuk kërkoj mëshirë por drejtësi për viktimat dhe veten”, theksoi Florin Besimi, Ish drejtor i Spitalit klinik.
Palët paralajmërojnë ankimin të vendimit në gjykatën e Apelit. Ndërsa të dëmtuarit gjykata i orientoi që dëmin jomaterial ta kërkojnë përmes procedurës civile. Vendimi i sotëm i gjykatës së Tetovës erdhi pas kthimit të lëndës nga Apeli në shkallë të parë, për shkak se aktgjykimi ishte i paqartë, i pakuptueshëm dhe i papërshtatshëm. Herën e parë dy ishte drejtorët ishin me dënuar me nga 1 vit e 6 muaj burg me kusht. / Alsat.mk
