Me ndryshimet në Ligjin për arsimin fillor, tentuam të zgjidhim në mënyrën më të mirë inkluzionin e nxënësve me aftësi të kufizuara, dhe prindërit nuk duhet të shqetësohen, pasi ndryshimi i modelit po bëhet për të mirën e fëmijëve, tha ministrja e Arsimit dhe Shkencës, Vesna Janevska, në emisionin “Top Tema” në TV Telma, transmeton Portalb.mk.
“Tashmë një kohë më të gjatë, ekspertët thonë se inkluzioni total ka qenë një projekt i dështuar, sepse një numër i madh fëmijësh që kanë vështirësi më të mëdha ose kanë multi-hendikep, inkluzioni total i ka lënë ata në shtëpi, pa arsim fare. Ligji i ri ofron mundësinë që të gjithë fëmijët me nevoja edukative speciale, që mund të shkojnë në shkolla të rregullta, të shkojnë. Por, nëse disa fëmijë nuk arrijnë sukses në shkollat e rregullta, ekziston mundësia, me lejen e prindërve, por para së gjithash me lejen e Komisionit për vlerësimin e funksionalitetit, që ata të regjistrohen në qendrat burimore, ku ka shumë më tepër ekspertë dhe ku mund t’u kushtohet më shumë vëmendje”, deklaroi mbrëmë Janevska.
Ministrja shtoi se ligji parashikon formimin e qendrave burimore komunale, diçka që aktualisht nuk ekziston.
Janevska tha se, nëse në të ardhmen rezulton se ky nuk është një zgjidhje e mirë, ligji mund të ndryshohet në çdo moment.
“Por, nevojitet një periudhë e caktuar që të funksionojë, në mënyrë që të mund të bëhet një analizë se cilat zgjidhje janë më të mira”, tha Janevska.
Ministrja njoftoi se dje në Kuvend u miratuan ligjet për arsimin fillor, për arsimin dhe trajnimet profesionale, për nxënësit, për arsimin e të rriturve dhe për kornizën kombëtare të kualifikimeve.
“Në ndryshimet dhe plotësimet e Ligjit për arsimin fillor, ne e zgjidhim problemin e ndarjes fizike ose segregimit të nxënësve, që ekziston sipas vendimit të Gjykatës për të Drejtat e Njeriut në Strasburg, për nxënësit romë. Kam shpjeguar tashmë se shteti nuk bën segregim, por kjo është një mënyrë jetese e disa grupeve etnike, ku ata grupohen në lagje të caktuara. Por, pasi kemi një vendim që duhet të respektohet, kemi marrë masa të caktuara për formimin e balancuar të klasave, ndryshimin e rregullimit të rajoneve dhe diskriminimin pozitiv me investime në shkolla“, tha Janevska.
Kujtojmë se, më 27 dhjetor Kuvendi miratoi ligjet e reja për arsim.
Më 20 dhjetor, Qeveria tërhoqi projektligjin për arsimin e mesëm me të cilin parashikohej që himni shtetëror të intonohet në fillim dhe në fund të vitit shkollor dhe në patronazhet e shkollave.
Kujtojmë që nismë për intonimin e humnit shtetëror nëpër shkolla pati vjeshtën e vitit 2023, ku disa komuna të Shkupot të cilat drejtohen nga kryetarët e VMRO-DPMNE-së e cila ishte në opozitë aso kohe. Ky veprim u cilësua si veprim provokativ dhe me tendencë për nxitjen e raporteve mes bashkësive etnike. Ndërkaq në korrik të vitit 2024 Këshilli Komunal i Velesit vendosi që në vitin e ri shkollor 2024/25, çdo të hënë në turnin e parë dhe të dytë do të këndohet himni kombëtar i Maqedonisë së Veriut në fillim të mësimit në shkollat fillore.
