Ministri Besar Durmishi shmang kaosin dhe bllokimin e pagesave të rrogave në shtet

Ministri i Ekonomisë dhe Punës, Besar Durmishi me nënshkrimin e rrogës minimale ka shmangur një kaos dhe bllokim të pagesës së rrogave në shtet. Këtë e deklaroi sot ministri në pyetje të gazetarëve, se pse e ka nënshkruar nivelimin e pagave, duke e ditur se ende nuk ka patur pajtueshmëri nga Këshilli Ekonomiko-Social.
“Pas vendimit të Qeverisë, unë si ministër e kam publikuar rrogën minimale. Pajtueshmëri nga Këshilli Ekonomiko-Social nuk ka për shkak se nuk ka përfaqësim nga sindikatat. Por, sipas Ligjit që është në fuqi dhe është i nënshkruar nga sindikatat dhe punëdhënësit, jam i obliguar dhe me vendim të Qeverisë, para 31 marsit të publikojë rrogën minimale. Nga rroga minimale më pas llogaritet edhe rroga mesatare dhe pagat tjera. Nëse nuk do ta kishim publikuar do të bllokohej i tërë shteti dhe të gjitha institucionet, ndërsa sektori privat nuk do të mund të përllogariste paga për të punësuarit e tyre”, ka deklaruar Durmishi.
I pyetur për protestat e Lidhjes së Sindikatave të Maqedonisë, të cilët sot protestojnë, tha se jetojmë në demokraci dhe çdokush ka të drejtë të del në rrugë dhe të shfaq pakënaqësitë e tyre.
“Paga minimale, sipas Ligjit ekzistues ose metodologjisë për të cilën janë dakorduar të gjitha palët, është 400 euro dhe paga neto është rritur me 1,800 denarë,” tha ai.
Mandati i sindikatave tashmë ka skaduar dhe ato nuk janë përfaqësuese. Për këtë arsye, ai tha se si Qeveri kanë formuar një komision që duhet të përcaktojë përfaqësueshmërinë e tyre.
“Ky komision po punon. Sapo të përcaktohet se cila sindikatë është përfaqësuese, menjëherë do të thërras mbledhjen e Këshillit Ekonomiko-Social. Pikërisht aty sindikatat duhet të paraqesin kërkesat e tyre, jo në rrugë,” shtoi ministri.