Mandati për formimin e qeverisë së re, Hristijan Mickoski, ka bërë të ditur se përbërja e qeverisë do të dorëzohet në Kuvend të martën, ndërsa më herët të dielën VMRO-DPMNE do t’i konfirmojë emrat e ministrave të saj.
Duke iu përgjigjur pyetjeve të gazetarëve në një ngjarje të BNJVL-së, Mickoski tha se në qeverinë e re do të jenë VMRO-DPMNE, VLEN dhe ZNAM, ndërsa në opozitë LSDM, BDI dhe Levica.
“Unë nuk do të flisja në emër të partive të tjera politike dhe në emër të partnerëve tanë të koalicionit, ata do ta thonë vetë atë që duhet të thonë. Sa i përket koalicionit “Maqedonia juaj” dhe VMRO-DPMNE, ne kemi një strukturë organizative, vertikale, funksionon në bazë të statutit dhe normalisht, në përputhje me ligjet dhe Kushtetutën. Këtë fundjavë, të dielën do të mbahet seanca e Komitetit Ekzekutiv dhe Qendror, vendimet e kuadrove do të prezantohen nga unë si mandatar, me biografinë e tyre. Lista zyrtare e Qeverisë së ardhshme së bashku me programin e punës do të dorëzohet në Kuvend më 18 qershor, e martë”, tha Mickoski.
Mickoski e ka marrë mandatin nga presidentja Gordana Siljanovska-Davkova më 6 qershor dhe ka afat prej 20 ditësh për të paraqitur programin dhe propozimin e përbërjes së qeverisë në Kuvend. Kuvendi cakton seancën për zgjedhjen e qeverisë së re brenda 15 ditëve nga marrja e propozimit dhe debati zgjat më së shumti dy ditë.
