Zëvendëskryeministri i parë i Maqedonisë së Veriut, Izet Mexhiti, mori pjesë në hapjen solemne të Konsullatës së Përgjithshme të Republikës së Shqipërisë në Strugë, duke e cilësuar këtë ngjarje si një moment historik për marrëdhëniet dypalëshe dhe për shqiptarët në rajon.
“Konsullata do të jetë një adresë konkrete për çdo shqiptar në rajon, një pikë lidhëse e gjallë mes Maqedonisë së Veriut dhe Shqipërisë”, shkroi Mexhiti, i cili në këtë ceremoni ishte së bashku me ministrin e Jashtëm të Shqipërisë, Igli Hasani, ministrin e Jashtëm të Maqedonisë së Veriut, Timço Mucunskin dhe ambasadorin shqiptar Denion Meidani.
Sipas tij, Struga si një qytet me rrënjë të thella historike dhe kulturore sot mori një dimension të ri duke u bërë portë diplomatike shqiptare në perëndim të Maqedonisë së Veriut.
“Hapja e kësaj Konsullate shënon një fazë të re të bashkëpunimit, të respektit të ndërsjellë dhe të afrimit ndërmjet dy vendeve tona,” përfundoi Mexhiti.
