Në një zhvillim të rëndësishëm infrastrukturor, sot u bë hapja zyrtare e një segmenti të ri të autostradës Kërçovë–Ohër, pjesë integrale e Korridorit 8 – një nga projektet më strategjike që po realizohen në Maqedoninë e Veriut, përcjell Zhurnal.mk.
Në njoftimin e bërë nga zëvendëskryeministri Izet Mexhiti, theksohet rëndësia shumëdimensionale e këtij investimi, i cili jo vetëm që përmirëson qarkullimin dhe efikasitetin ekonomik në perëndim të vendit, por edhe e vendos Maqedoninë e Veriut në një rrjet të ri bashkëpunimi dhe lidhjeje rajonale me Shqipërinë dhe më gjerë.
“Korridori 8 është një bosht i qartë lidhës ndërmjet Maqedonisë së Veriut, Shqipërisë dhe rajonit, me ndikim të drejtpërdrejtë në zhvillimin ekonomik, turistik dhe gjeopolitik të vendit,” deklaroi Mexhiti.
Ai nënvizoi se ky projekt do të ndihmojë në shkurtimin e kohës së udhëtimit drejt kufirit me Shqipërinë dhe do të nxjerrë vendin nga izolimi, duke e vendosur në funksion të bashkëpunimit rajonal dhe integrimit europian.
“Zhvillimi infrastrukturor është themeli i një zhvillimi të qëndrueshëm. Përgjegjësia jonë është që ky zhvillim të jetë i drejtë dhe në përputhje me nevojat reale të qytetarëve,” përfundoi Mexhiti.
Segmenti i hapur sot përfaqëson një hap të madh përpara në ndërtimin e plotë të Korridorit 8 dhe në forcimin e lidhjeve ndërfqinjësore dhe ndërkombëtare të Maqedonisë së Veriut.
