Rreth njëqind shkrimtarë britanikë protestuan jashtë selisë në Londër të gjigantit amerikan të teknologjisë Meta, duke e akuzuar atë për “vjedhje” të veprave të tyre për trajnimin dhe zhvillimin e inteligjencës artificiale (AI).
“Meta, Meta, hajdutë librash”, thërrisnin shkrimtarët duke mbajtur pankarta duke kritikuar kreun e kompanisë amerikane Mark Zuckerberg, raporton AFP.
Autorët janë të shqetësuar për përdorimin nga Meta të bibliotekës online LibGen, e cila promovon akses të lirë dhe të hapur në njohuritë akademike dhe përmban më shumë se 7.5 milionë libra dhe artikuj shkencorë.
Një padi e ngritur nga disa autorë kundër Meta-s në SHBA citon dokumentet e brendshme të kompanisë që tregojnë se Zuckerberg ka miratuar përdorimin e LibGen.
Revista Atlantic botoi së fundmi një bazë të dhënash të të gjithë titujve të disponueshëm në LibGen.
“Ne respektojmë të drejtat e pronësisë intelektuale të palëve të treta dhe besojmë se përdorimi ynë i informacionit për të trajnuar modelet e AI është në përputhje me ligjin në fuqi,” tha një zëdhënës i Meta-s, i paidentifikuar, për gazetën The Guardian.
Por jashtë selisë së kompanisë në Londër, autori AJ West tha se ndihej “i përdorur dhe i neveritur” kur zbuloi se libri i tij “Inxhinieri i Shpirtit” ishte në bazën e të dhënave.
“Është kaq e neveritshme të shohësh punën time duke u përdorur për të lejuar miliarderët e teknologjisë të fitojnë edhe më shumë para, pa lejen time”, tha West për AFP.
“Ata morën librat e mi për të ushqyer një teknologji të krijuar posaçërisht për të më shkatërruar mua.”
Në fund të shkurtit, më shumë se 1000 artistë britanikë, duke përfshirë muzikantët Elton John dhe Dua Lipa, denoncuan planin e qeverisë britanike laburiste për të relaksuar ligjin për të drejtat e autorit për të lejuar kompanitë e inteligjencës artificiale të përdorin përmbajtjen më lehtë. /tesheshi.com/
