Kancelari i Gjermanisë, Friedrich Merz, po qëndron në Bruksel për herë të parë që nga emërimi i tij, ku ka zhvilluar takime me liderët e BE-së. Gjatë takimit të tij të parë me presidentin e Këshillit Europian, Antonio Costa, Merz ka shprehur dëshirën që të gjithë të “jenë në gjendje t’i besojnë Gjermanisë dhe ta dijnë se mund të mbështeten te Gjermania”, shkruan Gazeta Sinjali.
Në lidhje me situatën në Ukrainë, Merz ka rishprehur mbështetje të fuqishme për këtë vend, duke thënë se Gjermania do të bëjë gjithçka që mundet për të përfunduar luftën sa më shpejt. Ai ka theksuar se “ukrainasit duhet të përfshihen” në çdo diskutim dhe ka garantuar se Bashkimi Evropian do të vazhdojë të mbështesë Ukrainën në aftësinë e saj për t’u mbrojtur.
Merz ka bërë gjithashtu një paralajmërim të qartë për Rusinë, duke thënë se nëse ky vend nuk angazhohet për paqe, do të përballet me sanksione të tjera. “Ne i bëjmë thirrje Rusisë që tani të angazhohet në një rrugë drejt një paqeje të qëndrueshme dhe nëse kjo nuk ndodh, ne nuk do të hezitojmë të rrisim presionin e sanksioneve me partnerët tanë evropianë dhe Shtetet e Bashkuara,” është shprehur ai.
Në përpjekje për të avancuar politikat e BE-së, Merz ka theksuar se shtetet anëtare duhet t’i japin përparësi avancimit të tregut të vetëm të BE-së dhe thjeshtimit të rregullave. Gjithashtu, ai ka mbrojtur planet për shtrëngimin e kontrollit kufitar, duke sqaruar se, pavarësisht spekulimeve në shtypin gjerman, nuk ka shpallur gjendje të jashtëzakonshme për migracionin dhe të gjitha kontrollet do të jenë në përputhje me ligjet e BE-së.
