Mbi 30.000 aplikime për regjistrim të votuesve nga diaspora janë bërë nga 29 gushti deri më 11 dhjetor, ku prej tyre 1.990 janë refuzuar, ka njoftuar Komisioni Qendror i Zgjedhjeve (KQZ).
KQZ-ka bëri të ditur se në shumicën e aplikimeve të refuzuara, aplikuesit nuk janë fotografuar duke mbajtur njëkohësisht në dorë dokumentin e identifikimit. Komisioni Qendror prezantoi raportin mbi ecurinë e zbatimit të planit të aktiviteteve për zgjedhjet parlamentare që do të mbahen më 9 shkurt.
Regjistrimi i aplikuesve nga diaspora do të përmbyllet më 26 dhjetor.
“Në bazë të të dhënave, deri më 11 dhjetor, në orën 09:00, pas aplikimit përmes platformës elektronike (http://diaspora.kqz-ks.org) janë aprovuar 30,656 kërkesa për regjistrim, ndërsa 1,990 janë refuzuar. Në shumicën e rasteve të refuzuara, aplikuesit nuk janë fotografuar duke mbajtur njëkohësisht në dorë dokumentin e identifikimit. KQZ i informon individualisht aplikuesit e refuzuar për arsye të refuzimit të kërkesës së tyre dhe gjithashtu aplikuesit e refuzuar njoftohen se mund të ri-aplikojnë për regjistrim dhe të bashkëngjisin dokumentet e nevojshme për të përmbushur kërkesën e tyre në përputhje me udhëzimet e KQZ-së”, është bërë e ditur të mërkurën në mbledhje, shkroi EO.
Periudha për ndërrimin e qendrës së votimit brenda komunës do të vazhdojë deri më 26 dhjetor. Deri të mërkurën (11 dhjetor) janë pranuar 3.208 kërkesa për ndërrim të qendrës. KQZ-ja ka bërë të ditur se po vazhdon edhe periudha për kundërshtimin e pasaktësive në listën preliminare të votuesve. Ajo do të zgjasë deri më 28 dhjetor.
“Gjatë kësaj periudhe, çdo person me të drejtë vote që nuk figuron në Listën Votuese, është caktuar gabimisht në qendër tjetër të votimit apo ka të dhëna të tjera të pasakta, përfshirë edhe rastet kur pretendon se ndonjë emër i votuesit nuk duhet të figurojë në këtë listë, qoftë edhe rastet kur figuron emri i ndonjë personi të vdekur, mund të kërkojë nga KQZ rishikimin e saj përmes sistemit elektronik apo duke u paraqitur në Komisionin Komunal të Zgjedhjeve në komunën përkatëse. Deri më tani, nuk është pranuar ndonjë kërkesë për kundërshtim”, thuhet në raportin e KQZ-së.
