Agjencia për Komunikime Elektronike Market Vision ka mohuar çdo lidhje me një anketë që këto ditë po shpërndahet në disa media, e cila pretendohet të jetë realizuar nga kjo agjenci dhe që paraqet BDI-në si forcën kryesore politike.
Në reagimin zyrtar, Market Vision sqaron se nuk ka ndërmarrë asnjë aktivitet të këtij lloji gjatë periudhës së përmendur dhe hedh poshtë çdo përfshirje në këtë proces.
“Demantojmë kategorikisht anketën e fundit e cila po qarkullon në disa media, gjoja se Market Vision është realizuesi i saj. Ne nuk kemi realizuar asnjë anketë gjatë periudhës 20 qershor – 4 korrik”, thuhet në reagimin e tyre.
Ky qëndrim vë në pah shqetësimin në rritje për përdorimin e emrave të institucioneve të njohura në funksion të përhapjes së dezinformatave, me qëllim që të ndikohen perceptimet e qytetarëve në periudhën parazgjedhore.
