Ekspertët e ndërtimtarisë vlerësojnë se kërkesa e lartë për banesa me qira po i mban çmimet e larta. Ata nuk presin që qiratë të ulen
Shkup, 27 maj – Përfitimet nga qiraja e banesave në Maqedoninë e Veriut janë mjaft të larta edhe në suaza evropiane. Këtu prin Shkupi me numrin më të madh të hapësirave të ndërtuara dhe që ofrohen për qiraxhinjtë. Bile në kryeqendrën e Maqedonisë kërkesa e tejkalon shumë ofertën dhe kjo është arsyeja pse çmimet e qirave po rriten. Në Shkup çmimet e qirave janë nga 200 euro e lart, por ka edhe banesa që jepen me qira nga 500-600 euro në muaj. Çmimet varen nga apartamenti i vjetër apo i ri, nga vendndodhja, nga mënyra se si është mobiluar.
Vitet e fundit, tregu i patundshmërive në Maqedoninë e Veriut, veçanërisht në kryeqytetin e saj Shkupin, ka pasur një aktivitet të konsiderueshëm. Statistikat tregojnë një tendencë të qëndrueshme të ndërtimit dhe shitjes së apartamenteve të shumta rezidenciale. Veçanërisht, pavarësisht rritjes së vazhdueshme të çmimeve të pasurive të paluajtshme që nga viti 2021, ka pasur një rritje të dukshme të kërkesës për blerje apartamentesh banimi. Njëkohësisht, interesi i investitorëve në ndërtimin e ndërtesave të banimit dhe zyrave mbetet i fortë, duke mos treguar shenja të rëndësishme rënieje
Të dhënat e fundit të Guidës Globale të Pasurive të Patundshme tregojnë se në tremujorin e parë të 2024, në Maqedoni rendimenti i qirasë me afër 6 për qind është mjaft i lartë dhe renditet në top dhjetëshin në Evropë sipas të ardhurave të qirasë së banesave. Me fjalë tjera me njëçmim të apartamentit prej 36 mijë euro dhe pagesën mujore të qirasë prej 200 euro, përfitimi apo të ardhurat mujore del se janë 6.67 për qind.
Ekspertët e ndërtimtarisë vlerësojnë se kërkesa e lartë për banesa me qira po i mban çmimet e larta. Ata nuk presin që qiratë të ulen, duke qenë se Shkupi është i mbushur me studentë nga qytetet dhe vendbanimet e tjera dhe me të huaj që vijnë në Maqedoni për të studiuar apo punuar. “Investimi në pasuri të paluajtshme konsiderohet ende një biznes i sigurt dhe fitimprurës. Qytetarët rrallë vendosin të ruajnë paratë e tyre në bankë, sepse nuk ka kamata të larta, andaj edhe blejnë patundshmëri dhe i japin me qira sqaron”, eksperti Nikolla Velkovski.
Nga ana tjetër Partia e Majta në fillim të këtij viti doli me propozim që qiraja e apartamenteve në vend në nivel vjetor nuk duhet të jetë më e lartë se 3 për qind e vlerës së kësaj pasurie të paluajtshme. Nga Kjo parti theksojnë se në këtë moment nuk ka kufi të sipërm për masën e qirasë, por me dekret të qeverisë përcaktohet vetëm qiraja më e ulët (prej 2 për qind e vlerës së apartamenteve).
Në ndërkohë, Guida shpalos se Letonia, Irlanda dhe Italia kryesojnë listën e vendeve me rendiment shumë të lartë mesatar të qirasë. Me një rendiment qiraje prej 8.06 për qind, Letonia renditet në krye të Evropës.
Nëse ato mbeten të qëndrueshme, do të duheshin afërsisht 12 vjet të ardhura nga qiraja për të rikuperuar investimin fillestar në pasuri të paluajtshme në Letoni. Në Irlandë dhe Itali, numri i viteve të kërkuara do të ishte përkatësisht trembëdhjetë dhe katërmbëdhjetë vjet. Në listë më tej pasojnë Rumania – 6.63 për qind, Lituania – 6.44 për qind, Turqia – 6.36 për qind, Britania e Madhe – 6.21 për qind, Spanja – 6.17 për qind, Maqedonia e Veriut – 6 për qind dhe Mali i Zi – 5.95 për qind
Të ardhurat më të larta të qirasë tregojnë kthime më të mira të investimeve, gjë që është thelbësore për çdo investitor . Blerja e një prone për 500.000 euro dhe fitimi i një qiraje mesatare mujore prej 2.000 euro (ose 24.000 euro në vit) rezulton në një rendiment vjetor bruto prej 4.8 për qind. Pas pagesës së taksave dhe kostove të tjera administrative, kthimi neto do të jetë më i ulët.
Nga ana tjetër janë renditur edhe shtetet që më dobët e kthejnë investimin nëse ofrohen me qira. Luksemburgu, i cili ofron të ardhurat e më të ulëta prej 2.67 për qind, është më pak tërheqës për investitorët. Një apartament me dy dhoma atje ka një çmim mesatar prej 1.2 milionë euro. Megjithatë, me një qira mesatare mujore prej 2.800 euro, ky investim sjell një kthim bruto nga qiraja prej vetëm 2.7 për qind, prandaj në Luksemburg do të duheshin mesatarisht 37 vjet që një investitor të kthejë investimin e tij fillestar në një apartament përmes qirave, duke supozuar kthimin e vazhdueshëm.
Pastaj vjen Zvicra, ku duhen 33 vite për të kthyer investimin që ka të ardhura prej 3.05 për qind e pasuar nga Austria me – 3.59 për qind. Në listë më tej renditen Malta – 3.66 për qind, Gjermania – 3.74 për qind, Norvegjia – 3.79 për qind, Republika Çeke – 3.95 për qind, Danimarka – 4.16 për qind, Belgjika – 4.20 për qind dhe Finlanda – 4.24 për qind. (koha.mk)
