Partia Demokratike e Kosovës ka votuar kundër përfshirjes së kreut të Nismës Socialdemokrate, Fatmir Limaj, në listën e PDK’së për zgjedhjet e 7 qershorit, shkruan Reporteri.net.
Vendimi është marrë në mbledhjen e Kryesisë, ka kumtuar Kreu i PDK’së, Bedri Hamza.
“Kësaj radhe z.Limaj nuk do të jetë pjesë e listës”, tha Hamza në një konferencë për media, pas mbledhjes.
Ai tha se presin që Limaj t’i mbështesë në këto zgjedhje dhe se në të ardhmen është i mirëpritur të jetë pjesë e PDK’së.
“…e presim dhe e mirëpresim kontributin e z.Limajt që do t’i jap PDK’së…z.Limaj në të ardhmen është i mirëpritur të jetë pjesë e PDK’së”, tha Hamza.
Kryetari i Nismës, Fatmir Limaj, i ka dërguar të enjten letër kreut të PDK-së, Bedri Hamza, që partia e tij të jetë pjesë e listës së kësaj partie, për të garuar në zgjedhjet e 7 qershorit.
Në letrën, Limaj ka shprehur gatishmërinë për bashkëpunim dhe bashkim politik, në “funksion të krijimit të një alternative të fuqishme dhe përfaqësuese për qytetarët e Republikës së Kosovës”.
“NISMA Socialdemokrate dhe unë, si kryetar i saj, kemi shprehur vazhdimisht, si para këtyre zgjedhjeve ashtu edhe në vazhdimësi, gatishmërinë për bashkëpunim dhe bashkim politik në funksion të krijimit të një alternative të fuqishme dhe përfaqësuese për qytetarët e Republikës së Kosovës”, thuhej mes tjerash në letër./Reporteri.net
