Shkup
Kryetari i Kuvendit të Republikës së Maqedonisë së Veriut, Afrim Gashi, sot realizoi takim me nënkryetarin e Agjencisë Turke për Bashkëpunim dhe Koordinim TIKA, Mahmut Çevik, transmeton Anadolu.
Në një kumtesë të dërguar nga Kuvendi i Maqedonisë së Veriut thuhet se kryetari Gashi shprehu mirënjohjen për spektrin e gjerë të aktiviteteve në Republikën e Maqedonisë së Veriut të zbatuara nga TIKA, e cila ka vite që është e angazhuar në vend dhe ka realizuar mbi 1.000 projekte në fusha të ndryshme.
“Kryetari i Kuvendit e përshëndeti bashkëpunimin e deritanishëm me Türkiyen në më shumë fusha të sigurisë dhe shprehu gatishmërinë për ta forcuar atë. Nënkryetari i TIKA-s, Mahmut Çevik, theksoi se Maqedonia e Veriut është vend shumë i rëndësishëm për Türkiyen dhe për këtë arsye e mbështesin zhvillimin e të gjitha segmenteve shoqërore, duke investuar në projekte të qëndrueshme”, thuhet në njoftim.
Në takim u shkëmbyen mendime për mundësinë e realizimit të projekteve të ardhshme të TIKA-s në vend, të cilat padyshim do të kontribuojnë në forcimin e marrëdhënieve bilaterale ndërmjet Republikës së Maqedonisë së Veriut dhe Republikës së Türkiyes.
Bashkëbiseduesit shprehën besimin dhe shpresën se bashkëpunimi i suksesshëm ndërmjet TIKA-s dhe Republikës së Maqedonisë së Veriut do të vazhdojë edhe në të ardhmen.
