Kryeministri i Spanjës, Pedro Sanchez e përshkroi luftën në Iran si “një gabim të madh”, duke kërkuar qasje më të sinqertë ndaj SHBA-së në një intervistë të botuar sot, transmeton Anadolu.
“Aleatët e mirë janë si miqtë e mirë. Ne i themi njëri-tjetrit të vërtetën pavarësisht gjithçkaje”, tha Sanchez për “The Wall Street Journal”, duke shpjeguar kundërshtimin e tij ndaj diplomacisë së presidentit amerikan Donald Trump, në të cilën ai beson në përfitimet e të folurit hapur për mosmarrëveshjet me Washingtonin në vend të shmangies së konfrontimit.
“Sipas mendimit tim, kjo luftë në Iran është një gabim i madh për botën dhe për këtë arsye për SHBA-në”, tha ai. Sanchez e përshkroi qasjen “jo ndaj luftës” të Spanjës si një kundërpeshë ndaj asaj që ai e përshkroi si vendimmarrje impulsive.
“Në këtë botë ku vendimet drejtohen gjithnjë e më shumë nga impulsi, nga Spanja ne ofrojmë të kundërtën: Ne ofrojmë parashikueshmëri”, tha ai.
Pavarësisht tensioneve dhe komenteve të Trumpit se “Spanja ka qenë e tmerrshme” dhe “ne nuk duam të kemi asgjë me Spanjën” pas refuzimit të Madridit për të përdorur bazat e saj për luftën në Iran, Sanchez mbajti një ton të matur në marrëdhëniet dypalëshe me SHBA-në.
Zyrtarët spanjollë më parë i kanë minimizuar kërcënimet e Trumpit për hakmarrje ekonomike, duke shprehur besimin se Washingtoni nuk mund të vendosë masa tregtare në një treg të vetëm të BE-së.
Sanchez tha se SHBA-ja eksporton më shumë në Spanjë sesa importon.
“Kemi një mosmarrëveshje të përkohshme, por mendoj se marrëdhënia midis SHBA-së dhe Spanjës është më e ngushtë se kurrë. Amerikanët e duan Spanjën”, tha kryeministri spanjoll.
