Kongresmeni i Shteteve të Bashkuara, Randy Fine, një aleat i presidentit Donald Trump, ka sugjeruar se “myslimanët kryesorë (mainstream)” duhet të shkatërrohen, duke u mburrur se nuk ka frikë të quhet islamofob.
Gjatë një seance dëgjimore në Kongres të martën, Fine – i cili ka një histori të gjatë deklaratash islamofobe dhe antipalestineze – përmendi mitin se izraelitët janë të ndaluar të hyjnë në disa zona të Bregut Perëndimor të pushtuar për shkak të “apartheidit” të imponuar ndaj kolonëve izraelitë.
Në realitet, ushtria izraelite, e cila kontrollon territorin palestinez, ka vendosur tabela paralajmëruese që i ndalojnë kolonët të hyjnë në qytetet palestineze për arsye sigurie.
Megjithatë, kolonët, shpesh të armatosur dhe të mbrojtur nga forcat izraelite, rregullisht bastisin dhe shkatërrojnë fshatra palestineze. Të paktën dy shtetas amerikanë janë vrarë këtë vit në sulme të kolonëve.
“Kur ke të bësh me një grup njerëzish që vazhdimisht bëjnë thirrje për shkatërrimin e Shtetit të Izraelit, që e pranojnë praninë e tabelave ku shkruhet ‘Hebrenjtë nuk lejohen të hyjnë në këto zona’, duam të jemi të lirë nga hebrenjtë – si mund të bësh paqe me këtë?” pyeti Fine Morton Klein, presidentin e Organizatës Sioniste të Amerikës, gjatë seancës dëgjimore.
“Si mund të krijosh një zgjidhje afatgjatë me këtë? Apo ka ndonjë rrugë tjetër që duhet ndjekur?”
Klein – i cili më herët ka përdorur fyerjen “arab i ndyrë” dhe ka bërë thirrje për profilizimin e myslimanëve në SHBA – tha se Islami duhet t’i nënshtrohet një “reformimi” dhe të pranojë “Izraelin si shtet hebre”.
“Askush nuk dëshiron të flasë për këtë. Kanë frikë se do të quhen islamofobë,” tha Klein.
Fine e ndërpreu duke thënë: “Unë nuk kam frikë nga kjo.”
Kongresmeni republikan amerikan, i cili përfaqëson një distrikt në shtetin e Floridës, më pas e thelloi edhe më tej retorikën e tij të rrezikshme.
“Nuk e di si mund të bësh paqe me ata që kërkojnë shkatërrimin tënd. Mendoj se fillimisht i shkatërron ata,” tha ai.
Një konventë e Kombeve të Bashkuara e përkufizon gjenocidin si “akte të kryera me qëllim shkatërrimin, tërësisht ose pjesërisht, të një grupi kombëtar, etnik, racor ose fetar, përfshirë vrasjen, shkaktimin e dëmeve, parandalimin e lindjeve, transferimin me forcë të fëmijëve dhe imponimin e kushteve të jetesës që çojnë në shkatërrim”.
Lufta gjenocidale e Izraelit në Gaza, e cila ka vrarë pothuajse 70.400 palestinezë dhe e ka shndërruar pothuajse të gjithë territorin në rrënoja, kishte për qëllim shkatërrimin e popullit palestinez, sipas grupeve për të drejtat e njeriut dhe hetuesve të OKB-së.
Shumë kritikë fillimisht e akuzuan Fine se po bënte thirrje për gjenocid ndaj palestinezëve. Por zyra e tij sqaroi të enjten se me deklaratën ai i referohej “myslimanëve kryesorë (mainstream)” në mënyrë të përgjithshme.
Abed Ayoub, drejtor ekzekutiv i Komitetit Amerikan-Arab Kundër Diskriminimit (ADC), e sulmoi ashpër Fine, duke e quajtur atë “versioni Temu i Benjamin Netanyahut”, në referencë ndaj platformës online me çmime të ulëta dhe kryeministrit izraelit.
“Ai urrehet si nga republikanët, ashtu edhe nga demokratët për politikën e tij: Izraeli i pari, Izraeli i dyti, Izraeli i treti – amerikanët askund. Në këtë pikë ai është në thelb një zëdhënës i huaj, madje as një i mirë,” i tha Ayoub Al Jazeera-s.
“Retorika e tij e çmendur dhe gjenocidale tregon dëshpërimin e tij, ndërsa përpiqet t’u bëjë qejfin shefave të tij në Tel Aviv.”
Kjo nuk është hera e parë që Fine – i cili u zgjodh në Kongres më herët këtë vit me mbështetjen e Trumpit dhe Komitetit Amerikan për Marrëdhënie Publike Izraelite (AIPAC) – ka bërë deklarata nxitëse ndaj palestinezëve.
Në vitin 2021, Fine komentoi në një postim në rrjetet sociale me një foto të një fëmije palestinez të vdekur, duke iu përgjigjur pyetjes se si fle natën me fjalët: “Shumë mirë, në fakt! Faleminderit për foton!”
Më herët këtë vit, ai shkroi “le të vdesin urie” në reagim ndaj një raporti për urinë vdekjeprurëse në Gaza si pasojë e bllokadës izraelite.
Vitin e kaluar, Fine lavdëroi vrasjen e Aysenur Ezgi Eygi, një aktiviste amerikane që u qëllua për vdekje nga ushtria izraelite në Bregun Perëndimor të pushtuar.
“Hidh gurë, merr plumb. Një #TerroristMuslim më pak. #Qëlloni,” shkroi Fine në një postim në rrjetet sociale.
Ai ka argumentuar gjithashtu më herët se frika nga myslimanët është e justifikuar. “Ndërsa shumë myslimanë nuk janë terroristë, ata janë radikalët, jo rrjedha kryesore,” shkroi ai në platformën X në vitin 2023. “Tani është koha të thuhet e vërteta, jo të lahemi në korrektësi politike që do të na vrasë.”
Pavarësisht këtyre deklaratave, Fine – i cili e quan veten “Çekani Hebre” – ka qenë mysafir i rregullt në disa media kryesore, përfshirë CNN.
Hatem Abudayyeh, kryetar kombëtar i Rrjetit të Komunitetit Palestinez në SHBA (USPCN), kritikoi republikanët në Kongres dhe Trumpin për dështimin e tyre për ta dënuar Fine.
“Është një gjë të lexosh 24 orë në ditë gjuhë të neveritshme, raciste, antipalestineze, antizezake dhe ksenofobe në rrjetet sociale, por nuk duhet ta dëgjojmë këtë nga zyrtarë të zgjedhur në këtë vend,” i tha Abudayyeh Al Jazeera-s.
“Kjo është ajo që ka sjellë epoka e Trumpit në arenën politike: gjuhë urrejtjeje nga njerëz plot urrejtje si Randy Fine, një apologjet i sëmurë sionist i gjenocidit, të cilit i lejohet të derdhë racizmin e tij pa asnjë dënim nga pjesa tjetër e partisë së tij apo nga presidenti i tij.” /Al Jazeera/
