Kryetari i Komisionit të Përhershëm Hetimor për Mbrojtjen e Lirive dhe të Drejtave të Njeriut dhe deputet në Parlamentin e Levicës, Dimitar Apasiev, sot pasdite e ndërpreu seancën e Komisionit, në rend dite të së cilës është peticioni i paraqitur nga Shoqata e Qytetarëve “16 Mars 2025 Koçani”, e njohur në publik si Shoqata e Prindërve të Fëmijëve që Vdiqën në Diskotekën “Puls” në Koçani. Ai theksoi se vazhdimi i seancës, në të cilën pritet të miratohen rezoluta, do të caktohet në mënyrë shtesë, transmeton Portalb.mk.
“Konstatoj se debati për pikën e rendit të ditës ka përfunduar. Pas diskutimit të hollësishëm, e ndërpres punën e seancës së pestë të sotme këtu dhe për vazhdimin e parë, në të cilin pres që deputetët të harmonizojnë dhe të miratojnë qëndrime, masa dhe përfundime përkatëse që do t’i propozonin për miratim, do të njoftoheni në mënyrë shtesë dhe me kohë në koordinim me paraqitësit”, tha Apasiev.
I gjithë lidershipi shtetëror – kryeministri Hristijan Mickoski, presidentja Gordana Siljanovska-Davkova dhe kryetari i Parlamentit Afrim Gashi, së bashku me deputetët dhe familjet e të vrarëve në zjarrin në Koçan, morën pjesë në seancën e Komisionit të përhershëm anketues për Mbrojtjen e Lirive dhe të Drejtave të Qytetarëve.
Seanca filloi në mesditë, dhe pika e vetme në rend të ditës ishte peticioni nga Shoqata “16 Mars 2025 Koçani”. Prindërit e viktimave të zjarrit në diskotekën “Puls” kërkuan drejtësi dhe përgjegjësi për tragjedinë që mori 63 jetë dhe plagosi mbi 200 persona.
Kryeministri Mickoski u tha gazetarëve se “nuk mund të ketë drejtësi në një Komision anetues”, duke theksuar se vetëm një proces gjyqësor mund të sjellë zgjidhje të drejtë. Ai shprehu ngushëllimet e tij për ata që vdiqën në tragjedi dhe tha se shteti do të bënte gjithçka që mundej për të ndihmuar ata që po marrin trajtim.
Deputetët e VMRO-DPMNE-së kërkuan largimin e Dimitar Apasievit, kryetarit të Komisionit, duke pretenduar se ai e kishte thirrur seancën “vetëm për të gërmuar në dhimbjen e prindërve”. Deputetja Ivanka Vasilevska paralajmëroi se formati i Komisionit nuk ka bazë ligjore për të mbajtur njerëzit përgjegjës dhe mund të përdoret për manipulim politik.
Ajo lexoi një letër nga Prokurori Publik Ljupço Kocevski, ku thuhej se po zhvillohen tre procedura në lidhje me tragjedinë: një në fazën e gjykimit në Gjykatën Themelore Penale në Shkup dhe dy në fazën e hetimit – në Prokurorinë për Krimin e Organizuar dhe në Prokurorinë Publike në Koçan. Kocevski paralajmëron në letër se procedurat paralele para Komisionit mund të kompromentojnë hetimin.
Apasiev iu kundërpërgjigj ashpër Vasilevskës: “E vërteta nuk ka nevojë për mbështetjen e Vmrovci-ve për të qenë e vërtetë. Zëri i nënave nuk mund të heshtet as ky parlament.”
Ai theksoi se Komisioni nuk kryen funksione hetimore, por gjetjet e tij mund të jenë baza për të filluar procedurë për të përcaktuar përgjegjësinë e mbajtësve të funksioneve publike.
Marija Petrushova nga Shoqata “16 Mars 2025 Koçani” kërkoi që rasti të trajtohet si shkelje e rëndë e të drejtave të njeriut, me theks në të drejtën për jetë.
“Kjo tragjedi nuk është vetëm pasojë e një shkëndije të vetme, por e dështimeve sistemike që kërcënojnë të drejtën për jetë dhe siguri”, tha Petrushova.
Kërkesat e familjeve janë mbështetje urgjente institucionale për të gjitha familjet, përgjigje e qartë për vonesën në hetim dhe afate specifike për përfundimin e procedurave.
“Qeveria ka detyrim ligjor, moral dhe njerëzor të veprojë qartë, drejt dhe me përgjegjësi. Fëmijët tanë e meritojnë. Dhimbja jonë e meriton”, shtoi Petrushova.
Seanca u thirr nga Dimitar Apasiev me kërkesë të prindërve. Levica tha se qeveria “po bën provë besimi” dhe se nuk ka vend për llogaritje partiake.
“Kanë kaluar nëntë muaj nga tragjedia dhe Parlamenti nuk ka marrë asnjë masë thelbësore”, theksoi partia.
Zjarri në Koçan shpërtheu natën e 15-16 marsit, duke rezultuar me 63 viktima dhe duke plagosur pothuajse 200 të tjerë.
