Kandidati i pavarur për Gostivarin, Visar Ademi thotë se Gostivari ka nevojë urgjente për rend, zhvillim ekonomik dhe arsim cilësorë

Përditësimi i fundit: 2025/08/30 at 7:52 PM

2 Min. Leximi

Visar Ademi i cili ditë më parë shpalli kandidaturën si i pavarur për qytetin e Gostivarit thotë se në garë futet si pasojë e urgjencës që ka qyteti për t’i menaxhuar institucionet dhe rendin publik. Sipas tij, Gostivari duhet që në rënd të parë të vendos qytetarin.

“Unë jam njeri që kam punuar në zgjidhjen e problemeve dhe implementimin e aktiviteteve dhe këtë e kam dëshmuar edhe lokalisht edhe ndërkombëtarisht, andaj dua që këtë përvojë apo eksperiencë, ta vë në shërbim të këtij qyteti që na dha aq shumë e i dhamë aq pak. Pres përkrahje të madhe nga qytetarët dhe ata që e duan zhvillimin, progresin dhe që kanë parë se për këto 35 vite demokraci partitë nuk po na japin zhvillimin por institucionin komunë e kthyen në shërbim të partive politike duke lënë shumë anash qytetarin, andaj unë dua ti kthehem qytetarit, që ka më tepër nevojë për institucionin”, tha Visar Ademi, Kandidat i pavarur për Gostivarin.

Fokusi i punës së tij do të jetë pastërtia e qytetit, zhvillimi ekonomik dhe arsimi cilësor.

“Gostivari nuk është larë nuk është pastruar 30 vite, shikojeni papastërtinë në qendër. Nuk ka asnjë lloj koncepti për mbetjet, për parkingjet nëntokësore u premtuan. Nuk ka asnjë plan për të rinjtë, për fuqizimin e tyre, për sipërmarrësin zhvillimin ekonomik. Dy gjëra do jenë pa kompromis, zhvillimi ekonomik lokal, sipërmarrësi dhe arsimi”, shtoi Visar Ademi, Kandidat i pavarur për Gostivarin.

Ndryshe për komunën e Gostivarit, në zgjedhjet e tetorit do të garojnë tre kandidatë, Sebaedin Dauti kandidat i koalicionit VLEN, Valbon Limani nga AKI dhe kandidati i pavarur Visar Ademi. /Alsat.mk