Ministrja e Arsimit, Vesna Janevska, pas përfundimit të debatit kushtuar propozim-ligjit të ri për arsimin e lartë, deklaroi se ka pasur një takim konstruktiv me përfaqësuesit e universiteteve private.
Në atë takim, ata u morën vesh për shuarjen e studimeve juridike në fakultetet private.
„Arritëm pajtueshmëri pothuajse për gjithçka, përfshirë edhe shuarjen e studimeve juridike në fakultetet private, gjë që u pranua nga të gjithë, përveç dy institucioneve publike të arsimit të lartë. Megjithatë, ky ligj dhe politikat që rrjedhin prej tij janë në interesin publik të shtetit dhe të rinjve të tij.
Roli i universiteteve është të krijojnë mirëqenie të përgjithshme dhe kapital njerëzor, i cili është i kualifikuar, kompetent, por që mbart edhe vlera morale, empati dhe përgjegjësi qytetare. Ky është funksioni kryesor i universiteteve.
Nëse këto institucione i përmbushin detyrat e tyre, shteti do të përparojë.
Ky ligj dhe politikat që ai parashikon i shërbejnë të mirës së përgjithshme. Jam shumë e kënaqur që universitetet private shfaqin një nivel të lartë reagimi. Ne vazhdojmë të merremi vesh me ta, dhe kur ta kompletojmë ligjin, do të takohemi përsëri për ta rishikuar dhe për t’u siguruar që gjithçka është në rregull, para se ta finalizojmë versionin e fundit të draftit“, deklaroi Janevska.
