Me kontrolle të rrepta dhe inspektim të jashtëzakonshëm të objekteve gastronomike, inspektorët e shumë komunave kanë dalë në terren.
Inspektoret e komunës Qendër, në bashkëpunim me policinë e stacionit policor “Beko” që të thirren sipas nevojës, edhe gjatë fundjavës ishin duke kontrolluar një nga një të gjitha objektet gastronomike.
Deri tani, janë shqiptuar edhe gjoba për ata që nuk kanë plotësuar kushtet ndërsa aty ku është vërejtur se mungojnë hidrantët apo aparatet kundër zjarrit, kanë informuar menjëherë inspektorët e Drejtorisë për Mbrojtje dhe Shpëtim.
“Sot kemi dalë në inspektim të jashtëzakonshëm, nuk është hera e parë, Inspektorët e Komunës Qendër kryejnë kontrolle edhe gjatë fundjavës, do të jemi këtu dhe patjetër të vendoset rend. Edhe Inspektori i banesave mori udhëzime nga shtabi që u mbajt që edhe ai të bëjë kontrolle të jashtëzakonshme në ndërtesat me banim kolektiv ku do të kontrollohen a janë hidrantët funksionalë, a kanë aparate kundër zjarrit, plan evakuimi, gjithçka që është në fusha e ligjit të banimit”, tha Miroslav Bogdanovski – Udhëheqës i sektorit Inspektues nga Komuna Qendër.
Përveç komunës Qendër që ka shtuar kontrolle të objekteve gastronomike, edhe në komunën e Aerodromit, Karposhit si dhe në disa komuna të tjera inspektorët janë në terren duke kontrolluar nëse posedojnë pajisje kundër zjarri.
Disa ditë më parë Qeveria miratoi vendim që detyroi Inspektoratin Shtetëror të Tregut që të kryejë mbikëqyrje të jashtëzakonshme inspektuese të objekteve gastronomike përfshirë, kabaretë, klube nate, diskoteka dhe diskoteka të hapura, në mbarë vendin./Alsat.mk
