Infektologu i njohur, Fadil Cana, ka reaguar ashpër ndaj gjendjes alarmante të pastërtisë në Shkup, duke e akuzuar kryetaren e qytetit, Danella Arsovska, për dështim të plotë në një nga detyrat më themelore, pastrimin e kryeqytetit.
Në një status të publikuar në rrjetet sociale, Cana thekson se rrugët e Shkupit janë shndërruar në deponi të hapura, ndërsa era e keqe, infeksionet, brejtësit dhe insektet janë bërë pjesë e përditshme e jetës së qytetarëve.
“Në këto temperatura të nxehta Shkupi po mbytet në mbeturina, ndërsa autoritetet e kryeqytetit heshtin! Kryetarja e Shkupit ka dështuar plotësisht në pastrimin e qytetit. Ky nuk është vetëm dështim menaxherial, por rrezik i drejtpërdrejtë për shëndetin publik,” shkruan Cana.
Ai paralajmëron se në këto kushte, përhapja e sëmundjeve infektive është e pashmangshme dhe fajëson autoritetet për kthimin e Shkupit në një “bombë biologjike” që rrezikon shëndetin e fëmijëve, të moshuarve dhe gjithë qytetarëve.
“Mjaft me paaftësinë! Mjaft me injorancën! Shkupi ka nevojë për përgjegjësi, jo propagandë,” përfundon reagimin e tij infektologu Cana.
