Bazuar në zuvillimet e fundit në koalicionin VLEN dhe largimin e Arben Taravarit dhe ASH-së nga koalicioni, deputetja e VLEN-it, Imerlije Saliu i ka falënderuar publikisht të gjithë 107.000 votuesit që e kanë mbështetur këtë koalicion në zgjedhjet parlamentare, duke shtuar se pavarësisht zhvillimeve të fundit, do të mbeten të përkustiar në ruajtjen e besimit të qytetarëve.
Postimi i plotë i deputetes Saliu në Facebook:
Si deputete e VLEN, ndjej përgjegjësi morale dhe politike përpara 107,000 qytetarëve që na besuan përfaqësimin e tyre dhe përkrahën me bindje të palëkundur idenë e ndryshimit. Zhvillimet e fundit brenda koalicionit pa gjykuar aspak qendrime e detaje, na vendosin përpara një reflektimi të domosdoshëm.
Dëshiroj t’ju drejtohem me ndershmëri e transparencë duke thënë, ju faleminderit për mbështetjen.
Ky projekt është një vizion kolektiv që ka marrë legjitimitetin nga qytetari, le të jetë e qartë VLEN mbetet fryma e NDRYSHIMIT.
Ne jemi të përkushtuar të ruajmë thelbin e këtij besimi dhe të punojmë me integritet për ta kthyer atë në veprim politik konkret.
Në këtë moment sfidues, ju siguroj se nuk do të lejojmë që shpresa që ngjallëm të zëvendësohet nga zhgënjimi. VLEN do të jetë gjithmonë zëri i atyre që duan, përfaqësim dinjitoz dhe një të ardhme të drejtë për të gjithë qytetarët.
