Ill Rustemi nga forumi rinor i koalicionit VLEN ka reaguar ashpër ndaj kandidatit për komunën e Sarajit, Blerant Ramadani, duke e akuzuar se ka marrë si propozim planprogramin e vitit 2021-2025 të ish-kryetarit Blerim Bexheti, i cili nuk është realizuar, përfshirë edhe premtimin për ndërtimin e një shtëpie të kulturës në Saraj.
Rustemi thekson se deri dje Ramadani dhe Bexheti ishin kundërshtarë të ashpër, ndërsa sot janë bashkuar në një “aleancë të çuditshme vetëm për karrige”.
“Që nga viti 2017 rinia e Sarajit ka dëgjuar të njëjtat premtime: qendër rinore, shtëpi kulture e madje edhe muze. Por asnjë prej tyre nuk u bë realitet. Ndërkohë, studentët, nxënësit e të rinjtë jetojnë pa transport publik të denjë, pa bibliotekë publike dhe pa hapësira të shëndetshme për zhvillim,” ka shkruar Rustemi.
Ai shton se rinia nuk ka nevojë për mashtrime dhe projekte imagjinare, por për punë konkrete, transparencë dhe kthim të besimit.
Sipas tij, ndryshimi i vërtetë në Saraj do të vijë vetëm me kandidatin e VLEN-it, Muhamed Elmazin, të cilin e cilëson si “kandidatin e shpresës dhe të vizionit madhështor për një Saraj ndryshe”.
“Saraji meriton më shumë, rinia meriton më shumë!” përfundon reagimi i forumit rinor të VLEN.
