Ministrja e Drejtësisë të Kosovës Albulena Haxhiu ka reaguar ndaj vrasjes së 18-vjeçarit nga dy bashkëmoshatarë të tij në Podujevë më 15 janar.
Haxhiu ka shtuar se drejtësia duhet të veprojë dhe dorasët të marrin dënimet meritore.
Ajo ka thënë se vrasja e të riut është një ngjarje që ka tronditur të gjithë qytetarët e Kosovës.
“Është tmerrues fakti kur dëgjon për humbjen e jetës së një të riu, aq më shumë kur jeta e tij merret dhunshëm, në mënyrë totalisht të pamëshirshme. Kjo ngjarje tronditëse prek në ndërgjegjen tonë qytetare dhe tërheq alarm institucional për edukim të mirëfilltë të fëmijëve”, ka shkruar Haxhiu në Facebook.
Ndërkohë që Prokuroria Themelore në Prishtinë ka cilësuar rastin ‘vrasje’ dhe kishte publikime të pamjeve brutale të këtij akti, ministrja Haxhiu thotë se këto pamje nuk mund të jenë të dobishme për askënd veçse për Prokurorinë, e cila duhet të veprojë dhe dorasët duhet të marrin dënime meritore.
“Nga njëra anë mungesë e theksueshme e emisioneve edukative, emancipuese, dhe në anën tjetër me nxitim shpërndarje të pamjeve të dhunës e vrasjeve. Kjo nuk është në rregull dhe si e tillë nuk mund të pranohet”, ka përfunduar Haxhiu.
Lulzim Fejzullahu ndërroi jetë dje në QKUK pas plagëve të marra gjatë një përleshjeje me dy të mitur të tjerë, të cilët kanë përdorur një shkop dhe ata tashmë ndodhen në paraburgim./
