Deputetja e koalicionit VLEN, Feride Haxhiu, ka reaguar ashpër ndaj ish-funksionarit të BDI-së, Qamil Kovaqi, i cili kishte komentuar zotimin e kandidatit të VLEN-it për kryetar të Sarajit, Muhamed Elmazi, për të sjellë një ambulancë të ndihmës së shpejtë në komunë – një kërkesë e kahmotshme e banorëve.
“Ti mund të qash, por pyetja thelbësore që ngrihet nga banorët e Sarajit është kjo: pse, për më shumë se 20 vite në pushtet lokal dhe qendror, nuk u adresuan këto probleme thelbësore? Mbi 20 vite përgjegjësi institucionale nuk sollën zgjidhje për nevojat elementare të kësaj komune. Kjo është çështja që kërkon përgjigje,” ka shkruar Haxhiu.
Ajo shtoi se bashkë me Muhamed Elmazin kanë vizionin dhe vendosmërinë për ta shndërruar Sarajin në një model zhvillimi e dinjiteti, duke theksuar se edhe Rashçes do t’i sigurohet ujë i pijshëm, një e drejtë bazike që nuk duhet të mungojë askund.
“Saraji meriton më shumë dhe më mirë,” ka përfunduar Haxhiu.
