Evenimenti i organizuar nga Ambasada e Shqipërisë në Maqedoninë e Veriut me rastin e Ditës së Flamurit, 28 Nëntorin, mblodhi të gjithë krerët shtetërorë dhe personalitetet më të rëndësishme të vendit, përfshirë liderët dhe funksionarët e lartë nga koalicioni qeverisës VLEN.
Poashtu prezent ishte edhe presidentja e shtetit, Gordana Siljanovska, ndërkaq mungoi kreu i BDI-së, Ali Ahmeti dhe ish funksionarët e tij të cilët gjatë periudhës sa ishin në qeveri krekoseshin me fotografi nga ky eveniment tradicional.
Kjo mungesë ka ngritur pikëpyetje dhe dyshime për një sabotim të qëllimshëm ndaj evenimentit të organizuar nga Ambasada e Shqipërisë.
Burime pranë organizatorëve të evenimentit bëjnë të ditur se të gjithë liderët e BDI-së ishin të ftuar, por asnjëri prej tyre nuk u paraqit, pavarësisht rëndësisë simbolike dhe diplomatike të ngjarjes.
Në vend të bashkëpunimit dhe mbështetjes për një ditë kaq të rëndësishme për shqiptarët në rajon, bojkoti nga ana e BDI-së duket se ishte një sinjal i qartë i qëndrimeve të brendshme politike dhe përçarjeve që kanë kapluar partinë e Ahmetit kohët e fundit.
Pyetja që ngrihet tani është: A ishte kjo një strategji e qëllimshme politike nga ana e Ahmetit dhe ish-funksionarëve të tij për të minimizuar rëndësinë e festës, apo thjesht një vendim i pamenduar mirë? Në çdo rast, ky veprim duket të jetë një goditje për imazhin e BDI-së.
Evenimenti, pavarësisht mungesës së një pjese të elitës politike shqiptare, u konsiderua një sukses diplomatik, duke rikonfirmuar rëndësinë e 28 Nëntorit si simbol të bashkimit kombëtar dhe mirëkuptimit ndërmjet popujve të rajonit.
