Gjykata Themelore Penale e Shkupit ka shqiptuar paraburgim 30-ditor për të dyshuarin e parë të lidhur me kompaninë, objekti i trajtimit të mbeturinave elektronike të së cilës në Trubarevë u përfshi nga zjarri të shtunën. Tre të dyshuarit e tjerë në këtë rast janë vendosur në arrest shtëpiak nga një gjyqtar i procedurës paraprake, konfirmoi Gjykata Penale këtë mëngjes, transmeton Portalb.mk.
Masat për të siguruar praninë e tyre u kërkuan dje nga Prokuroria Themelore Publike e Shkupit, si pjesë e hetimit që hapi kundër katër personave fizikë dhe kompanisë. Ata akuzohen për veprën penale të rrezikimit të mjedisit dhe natyrës me mbeturina, në lidhje me zjarrin në Trubarevë.
Paraprakisht, gjatë procedurës paraprake, katër të dyshuarve iu shqiptua dy herë paraburgimi për një periudhë të shkurtër prej 48 orësh.
Duke informuar për hetimin e filluar, Prokuroria njoftoi se i dyshuari kryesor në këtë rast nuk ishte regjistruar zyrtarisht si menaxher i kompanisë ku mbeturinat ishin ruajtur në mënyrë të papërshtatshme, por ai në të vërtetë veproi dhe ndërmori veprime ligjore në marrëdhëniet me palët e treta.
Kujtojmë se zjarri në Trubarevë shpërtheu më 13 shtator në objektin e firmës “F-Grupacioni” e cila merret me mbeturina elektronike, janë përfshirë edhe dy objekte në të cilët ka pasur sasi e madhe e mbeturinave plastike. Nuk pati të lënduar në zjarr, por gjatë natës së incidentit e deri në orët e pasdites, në rajonin e Trubarevës u realizuan 13 intervenime nga Ndihma e Shpejtë, gjatë të cilave një person u transportua në spital dhe u bë transporti në një vendbanim tjetër i një personi të palëvizshëm.
