Një flotilje me ndihma humanitare dhe aktivistë, përfshirë aktivisten suedeze të klimës Greta Thunberg, po niset sot nga Barcelona për në Gaza, me qëllim, sipas organizatorëve, “thyerjen e rrethimit të paligjshëm dhe hapjen e një korridori humanitar”.
Organizatorët e iniciativës globale Sumud Flotilla nuk specifikuan saktësisht se sa anije do të nisen ose në çfarë ore. Mbërritja në Gazën e shkatërruar nga lufta pritet në mesin e shtatorit.
“Ky do të jetë misioni më i madh i solidaritetit në histori, me më shumë njerëz dhe më shumë anije sesa në të gjitha përpjekjet e mëparshme së bashku”, tha aktivisti brazilian Thiago Ávila.
Sipas planit, dhjetëra anije të tjera duhet të nisen nga Tunizia dhe porte të tjera të Mesdheut më 4 shtator, ndërsa protesta dhe demonstrata në solidaritet me popullin palestinez janë njoftuar në 44 vende në të njëjtën ditë, sipas The Guardian.
Përveç Thunberg, flotilja do të përfshijë aktivistë nga disa vende, parlamentarë evropianë dhe figura publike, përfshirë ish-kryetaren e bashkisë së Barcelonës Ada Colau.
“Ne besojmë se ky është një mision në përputhje me ligjin ndërkombëtar”, tha deputetja portugeze Mariana Mortágua, e cila do t’i bashkohet konvojit.
Izraeli më parë ka parandaluar përpjekje të ngjashme për të dërguar ndihma nga deti. Në qershor, anija me vela Madleen u ndalua me 12 aktivistë, përfshirë Greta Thunberg, ndërsa në korrik, një grup prej 21 aktivistësh nga dhjete vende në anijen Handala përjetoi të njëjtën gjë. /tesheshi.com/
