Në numrin e fundit të të përjavshmes “Fokus”, kryetari i Kuvendit, Afrim Gashi ka folur për sulmet që janë bërë ndaj tij gjatë ditëve të fundit. Gjatë intervistës ai ka deklaruar se çështja e shkuarjes me makinë në dasëm në Kosovë është keqpërdorur dhe nxjerrë në mënyrë të shtrembëruar.
“Ka pasur pretendime të pabazuara se kam keqpërdorur automjetet zyrtare, pavarësisht se me ligj jam i obliguar që të jem i siguruar vazhdimisht si gjatë kryerjes së detyrës zyrtare ashtu edhe gjatë udhëtimeve private. Kur këto pretendime shihen të veçuara, ato mund të duken se janë thjesht tendenca për të paraqitur incidente. Megjithatë, unë besoj se ato janë simptoma të një çështjeje më të thellë që është prezente prej vitesh”, deklaroi Gashi.
“E gjithë kjo më jep të drejtën të kuptoj se kjo situatë nuk është rezultat i një përpjekjeje të paqëllimshme për të denigruar apo mosnjohje elementare e gjërave për çështje kaq të thjeshta, aq sa është rezultat i një rezistence të paprecedentë për të pranuar një profil të ndryshëm të Presidentit të Kuvendit, i cili pas 22 vitesh promovon vlera të ndryshme nga ato që ishin më parë. Fatkeqësisht, jeta e tyre përfundoi më 8 maj”, thotë Gashi.
Ai shton se misioni i tij politik ka qenë gjithmonë të tregojë se, siç thotë ai, vendin mund ta udhëheqin individë profesionistë, kompetentë, të kualifikuar dhe të mirëarsimuar. Njëkohësisht ai tregon se gjatë tre muajve që ka qenë në këtë detyrë ka ndërmarrë hapa të rëndësishëm për ngritjen dhe funksionalizimin e infrastrukturës parlamentare të Kuvendit.
“Zgjedhja ime kryetar i Kuvendit u mbështet nga të gjithë partnerët e koalicionit dhe integriteti im profesional është diçka për të cilën jam krenar, pavarësisht nëse të gjithë e vlerësojnë. Problemi që kanë disa qarqe nuk është te kualifikimet e mia, por te fakti që unë përfaqësoj një profil të ri të postit në këtë vend. Si kryetar i Kuvendit kam një të kaluar si jurist, redaktor, aktivist civil shumëvjeçar dhe përvojë dhjetëvjeçare politike”, deklaroi Gashi.
Përzgjedhja ime u bazua në meritë, jo në marrëdhënie ose lidhje të dyshimta. Ndryshe nga disa eksponentë të ngjashëm politikë, unë nuk kam asnjë familjar në poste të larta shtetërore, tek unë nuk mund të gjesh asnjë rast të keqpërdorimit të pozitës për përfitime personale apo familjare… – tha kryeparlamentari Gashi në intervistë.
