Franco Foda është trajneri i ri i Kombëtares së Kosovës në futboll, transmeton Anadolu.
Trajneri gjerman u prezantua si trajner i ri te Kosova në një konferencë për media nga Federata e Futbollit të Kosovës (FFK).
Kryetari i FFK-së, Agim Ademi, tha se Foda ka nënshkruar kontratë dyvjeçare dhe se nga ai pret rezultate të rëndësishme. Ai tha se trajneri gjerman “do t’i ketë duart e lira për të vendosur” dhe do ta ketë mbështetjen e FFK-së.
“Foda është trajneri i rezultateve. Ne këtë pjesë duam rezultate sepse e kemi bërë zhvillimin tonë. Shpresojmë që Foda të jetë trajneri që do të ngelë në historinë e Kosovës, për ta kualifikuar në garat evropiane. Foda ka qenë në Kosovë para dy javësh. I ka parë kushtet dhe ka vendosur. Ka kontratë dyvjeçare. Në këto dy vjet, në këto garat e radhës, do të realizojmë programin e tij dhe kërkesat tona. Në futboll s’ka asgjë të sigurt, por ne po përpiqemi ta bëjmë punën sa më të mirë”, ka thënë Ademi.
Foda, i cili është shprehur optimist se do të ketë sukses me Kosovën, do qëndrojë te ekipi kosovar bashkë me katër asistentë.
“Po shikoj përpara për sfidën e re dhe jam optimist se do të jemi të suksesshëm bashkarisht. Jam i bindur se bashkë me njerëzit, bashkë me Federatën do t’ia dal. Qëllimi im është të hyj sa më shpejt në rrjedhë të ekipit. Po përgatitemi për ndeshjet e marsit. Pas këtyre ndeshjeve do të kërkojmë kundërshtar më të përshtatshëm”, tha Foda në konferencën e prezantimit.
Trajneri gjerman 57-vjeçar ka theksuar se e ka pasur shumë të lehtë të vendosë për Kosovën pasi ka ardhur në Prishtinë dhe është shprehur i bindur se me disa detaje të vogla që do të ndryshohen do të ketë sukses.
Foda, i cili kohën më të madhe si trajner e kaloi në Austri, ka drejtuar për shumë vjet Sturm Grazin, me të cilin e ka fituar një herë titullin e kampionit dhe Kupën e Austrisë, ndërsa për një vjet ai e udhëhoqi edhe Kaisterslauternin në Gjermani.
Nga viti 2018 deri në vitin 2022, ai ishte trajneri i përfaqësueses së Austrisë, të cilën arriti ta kualifikonte në Evropianin e vitit 2020 dhe kaloi fazën e grupeve.
Më 22 mars, Kosova do të luajë ndaj Armenisë në Yerevan, ndërsa më 26 mars përballet me Hungarinë në Budapest.
Kosova ishte pa trajner që nga largimi i trajnerit Primozh Gliha, pas përfundimit të ciklit kualifikues për “Euro 2024”
