Një kod i ri sjelljeje për këshilltarët komunalë dhe rotacionin e tyre për dy vjet do të propozohet nga kreu i LSDM-së, Venko Filipce. Mbrëmë, në një takim me Organizatën Komunale të LSDM-së Aerodrom, ai njoftoi gjithashtu ndryshime specifike brenda partisë në metodën e përzgjedhjes së kandidatëve për kryetarë komune dhe këshilltarë në zgjedhjet e ardhshme lokale, transmeton Portalb.mk.
“Do të propozoj rotacion të këshilltarëve, pra të kenë mandat dyvjeçar, dhe pastaj ata të radhës nga lista do të hyjnë në këshill. Në këtë mënyrë, do t’u japim dy herë më shumë shokëve tanë një shans për të qenë këshilltarë brenda mandatit katërvjeçar. Kjo është e drejtë dhe ofron një mundësi për përfshirje më të madhe”, tha Filipce.
Ai njoftoi gjithashtu një kod të ri sjelljeje që të gjithë këshilltarët do të duhet ta nënshkruajnë.
“Disa nga këshilltarët e mëparshëm nuk e kryenin mirë punën e tyre, disa bashkëpunuan me kryetarë komune nga VMRO-DPMNE, por vetëm për interesa personale. Kjo nuk do të lejohet më. Do të ketë sanksione për shkeljen e kodit”, tha kreu i LSDM-së.
Lidhur me përzgjedhjen e kandidatëve, Filipçe tha se do të mbështesë çdo zgjidhje që vjen nga baza.
“Ju në organizatat komunale e dini më mirë se kush ka kapacitetin dhe besimin e qytetarëve. Nuk dua të imponoj, por të dëgjoj”, tha Filipçe.
