Sot, drejtori i Ndërmarrjes për Menaxhim me Kullotat Shtetërore, z. Bashkim Hasani, zhvilloi një vizitë pune në njësinë rajonale të kësaj drejtorie në Manastir. Gjatë vizitës, ai pati mundësinë të takohej me të punësuarit në këtë njësi, duke u njohur nga afër me funksionimin dhe aktivitetet e përditshme të saj.
Z. Hasani u informua për ecurinë e punës dhe projektet e ndërmarrjes në territorin e komunës së Manastirit, duke diskutuar gjithashtu për planet dhe prioritetet e ardhshme që synojnë përmirësimin e menaxhimit të kullotave shtetërore në këtë zonë.
Kjo vizitë vlerësohet si një hap i rëndësishëm për të forcuar bashkëpunimin dhe për të siguruar efikasitetin në funksionimin e njësive rajonale të ndërmarrjes. Drejtori shprehu mbështetje për angazhimin e ekipit dhe u zotua për përmirësime të mëtejshme në menaxhimin e resurseve shtetërore në këtë rajon.
