Në Larnaka, Qipro, kanë nisur punimet e Nicosia Risk Forum 2024, një ngjarje e rëndësishme ndërkombëtare që mbledh ekspertë dhe drejtues nga fusha e mbrojtjes civile dhe menaxhimit të krizave.
Drejtori i Drejtorisë për Mbrojtje dhe Shpëtim, z. Xhevat Selami, është pjesëmarrës në këtë forum, i cili shënon edhe përmbylljen e Projektit Ndërkufitar ROSES, të financuar nga DG ECHO. Projekti përfundon më 3 dhjetor 2024 dhe takimi i tij final u organizua pikërisht në kuadër të këtij forumi.
Gjatë punimeve të forumit, z. Selami zhvilloi disa takime joformale me përfaqësues të lartë të institucioneve dhe organizatave ndërkombëtare. Ndër ta, ai u takua me znj. Eirini Krampi, drejtore e Drejtorisë për Marrëdhëniet e Jashtme në Ministrinë Greke për Krizat Klimatike dhe Mbrojtjen Civile, dhe Evangelos Katsaros, anëtar i CERIDES (Qendra e Ekselencës për Ndryshimet Klimatike dhe Mbrojtjen Civile) pranë Universitetit Europian të Nicosia.
Po ashtu, drejtori realizoi një takim me George Boustras, këshilltar i Kryeministrit të Greqisë për mbrojtjen civile, si dhe me ministren e Bujqësisë dhe Mjedisit të Qipros, dr. Maria Panayiotou.
Në të gjitha këto takime, theksi u vu në rëndësinë e forcimit të bashkëpunimit ndërmjet vendeve dhe në zhvillimin e aktiviteteve të përbashkëta për mbrojtjen civile dhe implementimin e Mekanizmit Europian të Mbrojtjes Civile.
