Presidenti i Shteteve të Bashkuara, Donald Trump, rikonfirmoi interesin për të blerë nga Danimarka territorin autonom të Grenlandës. Gjatë një fjalimi në Kongres të martën, Trump e paraqiti idenë si një mundësi për zhvillimin e ishullit, si dhe rritjen e sigurisë për banorët që jetojnë aty.
“Ne do t’ju mbajmë të sigurt, do t’ju bëjmë të pasur, dhe së bashku do ta çojmë Grenlandën në nivele të papara më parë,” deklaroi presidenti amerikan.
Trump theksoi rëndësinë strategjike ishullit, duke e cilësuar si “një tokë jashtëzakonisht të rëndësishme për sigurinë ushtarake të SHBA-së”
Ishulli ndodhet në një pozicion kyç për sistemin e paralajmërimit të hershëm të SHBA-së për raketat balistike, si dhe për kontrollin e rrugëve të Arktikut.
Megjithëse shumica e groenlandezëve kundërshtojnë një bashkim me Shtetet e Bashkuara, një pjesë e konsiderueshme e popullsisë mbështet pavarësinë nga Danimarka. Pavarësisht interesit të Trumpit, Kopenhaga ka deklaruar se Groenlanda nuk është për shitje. Ambasadorja daneze në Kombet e Bashkuara, Christina Markus Lassen, konfirmoi se populli i Groenlandës ka të drejtën e vetëvendosjes dhe se Danimarka vazhdon të mbështesë sigurinë dhe zhvillimin e rajonit në bashkëpunim me NATO-n dhe SHBA-në.
Presidenti amerikan la të kuptohet se administrata e tij po punon me aktorë të ndryshëm për të avancuar këtë çështje. “Mendoj se do ta marrim, në një mënyrë apo në një tjetër,” tha ai, duke nxitur të qeshura nga republikanët e pranishëm në Kongres.
Ndërkohë, ky interes ka rritur debatet mbi pavarësinë e Greenlandit, me disa fraksione politike që kërkojnë përshpejtimin e procesit të shkëputjes nga Danimarka. Megjithatë, partia qeverisëse ka theksuar nevojën për një qasje të kujdesshme, duke marrë parasysh ndikimet ekonomike dhe sociale që mund të sjellë një vendim i tillë.
Diskutimet mbi të ardhmen e Groenlandës mbeten të hapura, ndërsa komuniteti ndërkombëtar, përfshirë dhe Rusinë, vazhdon të ndjekë nga afër zhvillimet në këtë territor të pasur me burime natyrore dhe me një rëndësi të veçantë gjeopolitike.
