“Deklaratat e forta nga përfaqësuesit e VMRO-DPMNE rreth ndryshimeve kushtetuese janë deklarata për konsum politik ditorë. Kreu i kësaj partie e ke të qartë se ky kompromis do të bëhet patjetër. Nëpër zyrat e Parlamentit deputetë të VMRO-DPMNE u thonë kolegëve shqiptarë se kjo do të ndodhe pas zgjedhjeve dhe se tani para zgjedhjeve nuk mund të bëjnë asnjë hap për efekte elektorale”, deklaroi për Frontline në gjuhën maqedonase analisti politik Driton Zenku.
“Është përgjigje e tyre se nuk mund ta rrënojnë rejtingun e partisë që e kanë ngritur pikërisht me këto kauza. Zyrtarisht nga VMRO-DPMNE është thënë se ndryshimet kushtetuese do të ndodhin por jo me diktatit bullgar. Ky është ai momenti i lojës me fjalë. Nëse do të ndodh që kjo parti do të hy në pushtet, propozimi i tyre për ndryshimet kushtetuese do të jetë ndryshe në nianca të vogla por në thelb asgjë nuk do të ndryshon.
Partia e Mickovskit e ka të njohur këtë fakt që për ata paraqet akt për të marrë pushtetin. Faktorit ndërkombëtar që është shprehur qartazi që cila duhet të jetë rruga e Maqedonisë së Veriut, i ndihmon edhe pozicioni unik i partive shqiptare rreth kushtëzimit për formimin e qeverisë së re”, deklaroi Zenku.
Për dallim nga ai, analisti politik Besim Nebiu është i mendimit se VMRO-DPMNE në këto zgjedhje hyn me avantazh sipas të gjitha sondazheve.
Sipas tij, ky avantazh në një masë është edhe për shkak të pozitës së betonuar sa i përket kornizës së negociatave.
“Çdo ndryshim apo “zbutje” e këtij qëndrimi mund t’u kushtojë vota që do t’i rrjedhin opsionit nacionalist – të majtës. Natyrisht, në fushatën zgjedhore LSDM-ja dhe të gjitha partitë shqiptare do të insistojnë në debatin për përparimin e negociatave me BE-në si “kusht i domosdoshëm” për formimin e qeverisë së re. Mos votimi i ndryshimit të kushtetutës do të thotë të refuzosh kuadrin e negociatave dhe të ndalosh automatikisht negociatat me BE-në pa i nisur ato. Natyrisht, edhe VMRO-ja e ka mjaft të qartë se kornizat negociuese të BE-së nuk ndryshojnë me asnjë pikë apo presje – thjesht nuk ka precedent të tillë në ekzistencën 73-vjeçare të BE-së, tha Nebiu për “Frontline”.
Por, shton ai, VMRO-DPMNE-ja do të dëshirojë që gjatë fushatës zgjedhore ta shmangë sa më shumë këtë çështje, gjegjësisht të dalë me qëndrime sa më të përgjithshme lidhur me ndryshimet kushtetuese në mënyrë që të mos tjetërsojë një pjesë të elektoratit të vet.
“Sa do të jetë e suksesshme kjo varet nga fushata e LSDM-së, e cila pres që këtë çështje ta bëjë një nga më kryesoret në fushatën e tyre zgjedhore”, thotë ai për gazetarin Destan Jonuzi. Frontline
