Siç raportohet, së fundmi janë mbyllur të gjitha qendrat e votimit në Francë, me një rezultat mjaft shokues.
Partia e ekstremit të djathtë në Francë, Fronti Kombëtar i Marine Le Pen, është rreshtuar në vendin e tretë, sipas exit poll-it.
Koalicioni i krahut të majtë Fronti i Ri Popullor pritet të marrë 172-205 vende, shkruan skynews, përcjell Telegrafi.
Në një surprizë të madhe, aleanca centriste e Emmanuel Macronit pritet të marrë rreth 150-175 vende.
Ndërkohë, Fronti Kombëtar dhe aleatët e saj presin të marrin 115-150 vende.
Bëhet e ditur se tani ka një “shok absolut” në Francë pas publikimit të rezultateve të para.
Duke reaguar ndaj lajmit se Fronti Kombëtar është parashikuar të përfundojë i treti në garë, me sa duket disponimi në selinë e partisë së Le Penit “nuk është i mirë”.
Ndryshe, Parlamenti francez i ka 577 ulëse, dhe për ta gëzuar shumicën, një parti duhet t’i fitojë 289 ulëse.
Që të gjithë transmetuesit e mëdhenj kanë parashikuar fitore për aleancën majtiste dhe jo për Frontin Kombëtar të Marine Le Penit dhe Jordan Bardellas.
Fronti Kombëtar, i udhëhequr nga Marine Le Pen, shënoi arritje historike në raundin e parë të zgjedhjeve fundjavën e kaluar, dhe pritej që ajo ta fitonte edhe raundin e dytë, duke i rritur gjasat që Franca ta kishte një qeveri të udhëhequr nga e djathta ekstreme për herë të parë prej Luftës së Dytë Botërore.
Lideri francez i qendrës së majtë, Raphael Glucksmann, tha se Franca duhet të gjejë paqe, pasi Fronti i Ri Popullor fitoi më së shumti ulëse në raundin e dytë të zgjedhjeve parlamentare.
“Kultura politike duhet të ndryshojë patjetër”, Glucksmann theksoi, duke shtuar se “një Parlament ku asnjëra parti nuk e ka shumicën dërrmuese, kërkon dialog”.
