Kryetari i Kuvendit, Afrim Gashi sot do të prezantojë Raport me rastin e njëvjetorit të mandatit. Në ditën e sotme, vitin e kaluar u konstituua edhe përbërja e re parlamentare – e 11-ta me rradhë që nga fillimi i pluralizmit në vend.
Për zgjedhjen e Gashit për kryetar të Dhomës ligjvënëse votuan 76 deputetë, ndërsa gjashtë ishin “kundër”.
Pas zgjedhjeve dhe dhënies së deklaratës solemne, Gashi iu drejtua foltores së Kuvendit, fillimisht duke ju falënderuar qytetarëve për besimin në zgjedhjet parlamentare, e pastaj deputetëve për mbështetjen në udhëheqjen e Dhomës ligjvënëse.
Në deklaratën e tij të parë si kryetar, Gashi tha se është i vetëdijshëm për përgjegjësinë që e ndërmerr, duke theksuar se gjatë kryesimit me Dhomën ligjvënëse, çdo deputeti do t’i garantohet e drejta për të shprehur pikëpamjet dhe mendimet e tij politike.
Pas më shumë se tre dekadash demokraci, tha Gashi, Kuvendi është vendi i duhur ku duhet të tregojmë në vepër se respektojmë mendimet e ndryshme.
Gashi e mori funksionin nga paraardhësi i tij, Jovan Mitreski. Në deklaratë pas pranim-dorëzimit të funksionit, Mitreski e uroi Gashin për zgjedhjen, theksoi se Kuvendi është institucioni më i rëndësishëm në vend dhe se është shumë me rëndësi të vazhdohet me përforcimin e pavarësisë së pushtetit ligjvënës në vend.
Në përbërjen parlamentare ka deputetë nga gjashtë subjekte politike, që morën pjesë të pavarur ose në koalicion në zgjedhjet parlamentare, me listat e tyre në gjashtë njësi zgjedhore. Koalicioni “MAQEDONIA E JUAJ” – VMRO-DPMNE-ja ka 58 mandate në Kuvend, ndërsa koalicionet “PËR TË ARDHME EVROPIANE” – LSDM-ja dhe “FRONTI EVROPIAN” kanë nga 18 vende të deputetëve. Koalicioni “VLEN” fitoi 14 mandate, ndërsa partitë “E Majta” dhe ZNAM nga gjashtë mandate.
