Ushtruesi i detyrës së Drejtorit të Institucionit Publik Parku Kombëtar Sharr, Ibrahim Dehari, ka njoftuar se sot pritet të mbahet mbledhja e parë konstituive e Bordit të ri Drejtues, ku sipas tij, mund të ndodhë largimi i tij nga pozita, shkruan 3-shi.net.
Dehari, i cili u emërua në këtë post nga qeveria e kaluar, tha se nuk është anëtar i asnjë partie politike dhe se ka dërguar një letër kryeministrit Hristijan Mickoski, duke kërkuar që t’i mundësohet të vazhdojë punën e tij në institucion. Me këtë veprim, ai duket se po përpiqet të mbajë një qëndrim të pavarur, duke u distancuar nga çdo lidhje partiake, përfshirë edhe nga BDI-ja e Ali Ahmetit, që udhëhoqi qeverinë në kohën kur ai u emërua.
Në letrën e tij, Dehari ka theksuar arritjet gjatë mandatit të tij dhe ka shprehur gatishmërinë për të vazhduar angazhimin në mbrojtjen e Malit Sharr dhe interesave të natyrës dhe njerëzve. Ai gjithashtu ka paralajmëruar për sfidat dhe “dhunimet” ndaj natyrës, duke kërkuar që puna e tij të mos pengohet nga ndërhyrje politike.
“Me gjithë respektin e duhur ndaj Qeverisë, si një mundësi e fundit për të vazhduar punën e suksesshme, sot iu drejtova me shkrim Kryeministrit. Letrën po e ndaj me ju në mënyrë të plotë,” ka shkruar Dehari.
Qëndrimi i tij ngriti pikëpyetje për pozicionin e tij politik dhe distancën e mundshme nga struktura politike e BDI-së, veçanërisht në një kohë kur ky subjekt përballet me akuza për ndikim në institucione dhe zvarritje të reformave.
