E pyetur nëse në ligjin për branitellat do të pranonte që të përfshihen edhe ish pjesëtarët e UÇK-së, deputetja propozuese e LSDM-së Sllavjanka Petrovska u përgjigj kështu:
“Jo! Sepse ky ligj është për të drejtat e pjesëtarëve të forcave të sigurisë”, tha Sllavjanka Petrovska, deputete e LSDM-së.
Por bashkëpartiaku i saj, deputeti Fatmir Bytyqi, thotë se LSDM është e gatshme të ulet dhe të mbyllin një herë e përgjithmonë temat që trazojnë marrdhëniet ndëretnike.
“LSDM është e gatshme të zgjidhë të gjitha problemet të cilat një herë e përgjithmonë do të mbyllin temat që trazojnë marrdhëniet ndëretnike. Siç tha kryetari Venko Filipçe, po e them edhe unë. Ne jemi të gatshëm për të diskutuar për zgjidhjen e problemit të të gjithëve të cilët kanë qenë të përfshirë në konfliktin e 2001-shit. Sepse rrugë tjetër nuk ka. Prandaj në vend se të akuzojmë njëri tjetrin, është mirë që të gjitha partitë që kanë qenë ndonjëherë në pushtet apo edhe ato që tani janë në pushtet të ulen e të shohin se cila është e ardhmja e këtij shteti”, tha Fatmir Bytyqi, deputet i LSDM-së.
I pyetur nëse janë të pranueshme kërkesat e partive shqiptare, që në ligjin për branitellat të përfshihen dhe ish pjesëtarët e UÇK-së, Bytyqi tha se nuk kanë parë asnjë kërkesë në Kuvend.
“Asnjë kërkesë të tyre ne nuk kemi parë. Kërkesa jepet me shkrim, me propozime në Parlament. Askund tjetër”, shtoi Bytyqi.
Për këtë temë edhe zv.kryeministri i parë Izet Mexhiti, pyeti se çfarë ka ndodhur me LSDM-në pasi nga koncept qytetar, kaloi në koncept nacionalist. Si Mexhiti ashtu edhe aktorë tjerë politik shqiptarë, këmbëngulin se ky propozim ligj nuk kalon. Për momentin propozim ligji ka ngecur në komisionin për politikë sociale e cila udhëhiqet nga deputetja Ilire Dauti, pjesë e Frontit Europian. Ajo edhe më tej nuk ka ndërmend që të thërrasë seancë me rend dite ligjin për branitellat. Nga ana tjetër ndonëse I bëhet presion që ta thërrasë kryetari i Kuvendit seancën e komisionit, Gashi pardje deklaroi se ai vetëm se e ka kryer obligimin e tij që t’i dërgojë thirrje kryetares së komisionit që të thërrasë seancë, gjë që ajo e ka bërë. Nëse ajo nuk ka vepruar sipas rregullores, Gashi tha se nuk është ai i cili duhet ta konstatojë këtë gjë.
