Ministria e Transformimit Digjital do ta promovojë zyrtarisht më 28 tetor aplikacionin e ri për celularë “m.Услуги” (m.Shërbime), njoftoi ministri Stefan Andonovski.
Aplikacioni do të jetë plotësisht falas dhe do të mund të shkarkohet përmes platformës Google Play për përdoruesit e Android-it dhe App Store për përdoruesit e iOS-it. Hyrja në aplikacion do të bëhet lehtësisht, duke përdorur profilin ekzistues të përdoruesit në portalin kombëtar uslugi.gov.mk.
Në fazën e parë, pas aktivizimit të aplikacionit, qytetarët do të mund t’i shohin në version elektronik:
Letërnjoftimin
Patentë-shoferin
Tri shërbime të tjera administrative
Hap drejt krijimit të një portofoli plotësisht digjital
Ministri Andonovski shpjegoi se synimi është që aplikacioni gradualisht të shndërrohet në një portofol digjital funksional. Në fazat e ardhshme, në të pritet të integrohen edhe të dhënat shëndetësore, si dhe një sërë dokumentesh dhe shërbimesh të tjera publike.
Përdorimi i aplikacionit do të jetë vullnetar. Ndërkohë, të gjitha institucionet kompetente do të duhet t’i përshtatin gradualisht aktet e tyre nënligjore, procedurat e brendshme dhe kapacitetet teknike, me qëllim që dokumentet digjitale të pranohen pa pengesa gjatë punës së përditshme me qytetarët.
