Ambasadori i Maqedonisë së Veriut në NATO, Orhan Murtezani, ka zhvilluar një takim me ambasadorin e Shteteve të Bashkuara në NATO, Matthew Whitaker, ku kanë diskutuar për të ardhmen e bashkëpunimit transatlantik dhe prioritetet e përbashkëta në fushën e sigurisë.
Murtezani e cilësoi takimin si një mundësi për një diskutim konstruktiv mbi forcimin e partneritetit ndërmjet vendeve aleate dhe përballjen me sfidat e sigurisë në hapësirën euroatlantike.
“Kisha nderin ta takoja Ambasadorin e SHBA-së në NATO, Matthew Whitaker, për një diskutim konstruktiv mbi të ardhmen e bashkëpunimit transatlantik dhe prioritetet tona të përbashkëta në fushën e sigurisë”, deklaroi Murtezani.
Sipas tij, gjatë takimit u theksua rëndësia strategjike e një partneriteti të fortë dhe të bashkuar transatlantik, me fokus të veçantë në sigurinë e Ballkanit Perëndimor.
“Diskutuam rëndësinë strategjike të një partneriteti të fortë dhe të bashkuar transatlantik, me vëmendje të veçantë për forcimin e sigurisë, stabilitetit dhe qëndrueshmërisë në Ballkanin Perëndimor dhe në hapësirën më të gjerë euroatlantike”, tha ambasadori Murtezani.
