Komunikata e plotë e VLEN-it
Ali Ahmeti, i përjetshmi në krye të BDI-së, po e luan sërish lojën me dy fytyra. Nga njëra anë, gjoja po e shpëton Artanin nga arresti, ndërsa nga ana tjetër, përmes Artanit po ia fut këmbën Bujarit.
Prej kohësh pëshpëritet se Bujar Osmani, pas dyerve të mbyllura, po kërkon që Aliu të tërhiqet, në mënyrë që BDI-ja sërish të bëhet një opozitë konkurruese. Ndërsa Bujari, natyrisht, mezi pret rastin për t’u vërsulur drejt kolltukut të kryetarit në Reçicë të Vogël.
Prandaj nuk është aspak e rastësishme që Ahmeti sërish e nxori në skenë trukun e vjetër me tërheqjen. Gjoja ai dëshiron të largohet, por njerëzit rreth tij nuk e lejojnë.
Intriganti Ahmeti po përpiqet ta forcojë përplasjen mes Artanit dhe Bujarit, duke e drejtuar me mjeshtëri gishtin nga Osmani si fajtor për qëndrimin e BDI-së ndaj aktakuzës për “Lotarinë Shtetërore”.
Thjesht, në BDI po zien.
Artani, përmes mbështetësve të tij besnikë, tashmë po dërgon mesazhe publike. Është e qartë se po e kupton se “të vetët” e kanë lënë në baltë. Deri dje i thoshin “shef”, “vëlla” dhe “king”, ndërsa sot të gjithë kanë ngritur duart dhe bëjnë sikur nuk e njohin.
Tani topi është te Artani. Ajo që ai, si “kutia e zezë” e BDI-së, do të thotë para organeve të drejtësisë, mund të përcaktojë fatin e të gjithë udhëheqjes së pareformuar të partisë.
Prandaj në Reçicë të Vogël nuk flenë të qetë. Disa kanë frikë nga ajo që di Artani, të tjerë nga ajo që mund të thotë, ndërsa të tretët tashmë llogarisin se kë do ta tërheqë me vete. BDI-ja prej kohësh nuk funksionon vetëm si parti politike, por si një bandë politike, interesi kryesor i së cilës janë tenderët dhe shpëtimi i lëkurës së vet.
Të drejtat e shqiptarëve janë vetëm “alibi e përsosur” për këtë udhëheqje të pareformuar të BDI-së, qëllimi i vetëm i së cilës është të mbrojë pasurinë e krijuar përmes korrupsionit dhe hajdutërisë.
